اگر آپ کو سرد موسم میں ہر وقت پانی کی طلب محسوس ہوتی ہے تو خبردار ہوجائیں کہ یہ 6 ایسے خطرات کی نشانی ہے، جن کی طرف آپ کو فوری متوجہ ہونے کی ضرورت ہے۔
اگر آپ روزانہ 6 سے 8 گلاس پانی پیتے ہیں اور پھر بھی مسلسل شدید پیاس کا احساس ستاتا رہتا ہے تو ڈاکٹر سے رجوع کرنی چاہیے، کیوں کہ بہت زیادہ پیاس کی چند وجوہ مندرجہ ذیل ہو سکتی ہیں۔
جسم میں پانی کی کمی
جسم میں پانی کی کمی کی صورت میں پیاس لگنے لگتی ہے، اور ہر انسان کی جسمانی ضروریات مختلف ہوتی ہیں، وہ اسی کے مطابق کم یا زیادہ پانی پیتے ہیں، جیسا کہ کوئی چھ گلاس پیتا ہوگا تو کسی کو آٹھ گلاس میں بھی پیاس لگتی ہوگی۔
اگر آپ کو زیادہ پیاس لگتی ہے بالخصوص خشک موسم میں، تو اس کا ایک مطلب یہ ہو سکتا ہے کہ آپ کے جسم کو پانی کی زیادہ ضرورت ہے، لہٰذا آپ اسے سمجھیں اور اسی کے مطابق پانی کی مقدار بڑھائیں۔
نمک کا استعمال
ہمارے جسم کو نمک اور پانی کے درست توازن کی ضرورت ہوتی ہے، زیادہ نمک والی غذائیں پیاس بڑھا دیتی ہیں، جب نمک کا استعمال زیادہ ہو جائے تو خون میں پانی کی سطح گر جاتی ہے جس کے نتیجے میں ہر وقت پیاس لگنے لگتی ہے اور بندہ زیادہ پانی پینے لگتا ہے، اگر کھانے کے بعد پیٹ پھول جائے یا گیس محسوس ہو تو سمجھ لیں کہ جسم نے پانی کا کچھ حصہ وہاں اکھٹا کر دیا ہے جو کہ کئی مسائل کا باعث بن سکتا ہے۔
ادویات
کچھ ادویات منہ کو خشک کرتی ہیں جس سے پیاس کا احساس ہوتا ہے، اگر آپ ادویات استعمال کرتے ہیں اور پیاس کا احساس زیادہ ہوتا ہے تو ڈاکٹر سے رجوع کریں۔
ذیابیطس
ذیابیطس جسم کی مٹھاس کو ٹکڑے اور ذخیرہ کرنے کی صلاحیت کو متاثر کرنے والا مرض ہے، جس کے نتیجے میں خون میں شوگر کی سطح بڑھ جاتی ہے اور پیشاب زیادہ آنے لگتا ہے، جس سے جسم میں پانی کی کمی ہونے لگتی ہے اور پیاس بہت زیادہ بڑھ جاتی ہے، یوں کہہ لیں کہ مسلسل پیاس اور پیشاب کا آنا اس مرض کی دو واضح علامات ہو سکتی ہیں، لہٰذا ڈاکٹر سے شوگر چیک کروا لیں۔
آٹو امیون امراض
آٹو امیون امراض کے نتیجے میں آنکھیں اور منہ خشک ہو جاتے ہیں جس کی وجہ سے زیادہ پیاس لگتی ہے، اگر آپ کا منہ ادویات کے استعمال یا بغیر کسی وجہ کے اکثر خشک رہتا ہے اور پیشاب بھی زیادہ نہیں آتا تو یہ آٹو امیون امراض کا نتیجہ ہو سکتا ہے۔
ہارمون کا توازن
اگر ہارمونز کا توازن بگڑ جائے تو اس سے نمک اور پانی کی سطح پر اثرات مرتب ہوتے ہیں اور بہت شدید پیاس لگتی ہے، ایسے افراد، چاہے وہ زیادہ پانی نہ بھی پئیں، کو ہر وقت پیشاب آتا رہتا ہے۔
