کراچی: پاکستانی شوبز انڈسٹری کی معروف اداکارہ نیلم منیر نے بانی پاکستان قائد اعظم محمد علی جناح کو اپنا آئیڈیل قرار دے دیا۔
تفصیلات کے مطابق شوبز فنکاروں کی جانب سے سماجی رابطے کی ویب سائٹس پر مختلف تصاویر اور ویڈیوز شیئر کی جاتی ہیں جن کا مقصد مداحوں سے وقتاً فوقتاً رابطہ رکھنا ہوتا ہے، مداح بھی اپنے پسندیدہ فنکاروں کی پوسٹ میں دلچسپی لیتے ہیں اور انہیں سراہتے ہیں۔
معروف اداکارہ نیلم منیر نے سماجی رابطے کی ویب سائٹ انسٹاگرام پر بانی پاکستان قائد اعظم محمد علی جناح کے ایک خطاب کی ویڈیو پوسٹ کی۔
اداکارہ کی جانب سے شیئر کردہ پوسٹ میں قائد اعظم محمد علی جناح اعلان کررہے ہیں کہ ’پاکستان کی قومی زبان اردو ہے۔‘
قائد اعظم نے فرمایا ’ جو بھی آپ کو گمراہ کرنے کی کوشش کرتا ہے وہ واقعتاً ملک کا دشمن ہے، ایک زبان کے بغیر کوئی قوم متحد نہیں رہ سکتی۔‘
نیلم منیر نے اپنی پوسٹ کے کیپشن میں لکھا کہ ’قائد اعظم محمد علی جناح میری سب سے پسندیدہ شخصیت اور میرے آئیڈیل ہیں۔‘
اداکارہ کی پوسٹ کو مداحوں کی جانب سے خوب سراہا جارہا ہے اور اس پوسٹ پر ہزاروں کی تعداد میں لائکس آچکے ہیں۔
یاد رہے کہ اس سے قبل نیلم منیر نے انسٹاگرام پر مداحوں کے لیے معنی خیز پیغام جاری کرتے ہوئے کہا تھا کہ آزمائش مشکلات کا نہیں بلکہ کامیابی کا سبب بنتی ہیں۔
