نہرو کپ کا فائنل میچ سنسنی خیز مراحل میں داخل ہوچکا تھا۔ پاکستانی کھلاڑی حریف ٹیم کے بولر کا سامنا کر رہے تھے۔ اُس اوور کی دو گیندیں باقی تھیں اور نہرو کپ جیتنے کے لیے پاکستانی بلّے بازوں کو تین رَن بنانے تھے۔ ان کا مقابلہ ویسٹ انڈیز سے تھا۔
نہرو کپ کے فائنل میں پاکستان کی جانب سے مایہ ناز کھلاڑی وسیم اکرم ویسٹ انڈیز حریف ٹیم کے بولر کا سامنا کر رہے تھے۔
پاکستانی شائقینِ کرکٹ کے دل کی دھڑکنیں تیز ہوگئی تھیں۔ قوم اپنی ٹیم کی فتح کے لیے دعائیں کر رہی تھی۔ حریف کھلاڑی کی جانب سے تیز رفتار گیند وسیم اکرم کے بلّے پر آئی اور اگلے ہی لمحے باؤنڈری سے باہر تھی! وسیم اکرم نے چھکا مار کر پاکستان کو نہرو کپ کا فاتح بنا دیا۔ یہ فائنل میچ ایڈن گارڈن کلکتہ میں یکم نومبر کو کھیلا گیا تھا۔
نہرو کپ کا انعقاد 1989 میں بھارت نے جواہر لعل نہرو کے صد سالہ یومِ پیدائش کی مناسبت سے کیا تھا۔ وہ بھارت کے پہلے وزیرِ اعظم اور انڈین نیشنل کانگریس کے راہ نما تھے جن کا تحریکِ آزادیٔ ہند میں اہم کردار رہا۔ جواہر لعل نہرو 14 نومبر 1889ء کو الٰہ آباد میں پیدا ہوئے تھے۔
نہرو کپ میں میزبان بھارت کے علاوہ پاکستان، انگلینڈ، ویسٹ انڈیز، آسٹریلیا اور سری لنکا کی ٹیموں نے حصّہ لیا تھا۔ چھے ٹیموں کے مابین یہ مقابلہ 15 اکتوبر کو شروع ہوا تھا اور فائنل میں پاکستان اور ویسٹ انڈیز کی ٹیمیں آمنے سامنے تھیں۔اس میں وسیم اکرم نے چھکا لگا کر ہدف پورا کر لیا اور چار وکٹوں سے پاکستان نے نہرو کپ جیت لیا۔ مین آف دی میچ کا اعزاز عمران خان کو دیا گیا۔
نہرو کپ ٹورنامنٹ میں پاکستان نے مجموعی طور پر 11 میچز کھیلے جن میں سے 9 میں کام یابی حاصل کی۔ پاکستان نے سیمی فائنل میں انگلستان کی ٹیم کو شکست دی تھی۔ نہرو کپ کے فائنل میں ویسٹ انڈیز نے اپنی اننگز میں 273 رنز اسکور کیے تھے۔
