اسلام آباد: وزارت پانی و بجلی نے سنہ 2014 میں اوور بلنگ کے معاملے پر کے الیکٹرک کے خلاف تحقیقات پر عدم اعتماد کا اظہار کردیا۔ کراچی کے صارفین کو مہنگی بجلی کی فروخت پر وزارت پانی و بجلی اور نیپرا کے درمیان ٹھن گئی۔
تفصیلات کے مطابق وزارت پانی و بجلی نے سنہ 2014 میں اوور بلنگ کے معاملے پر کی جانے والی نیپرا کی تحقیقات اور جواب کو رد کر دیا۔
وزارت پانی و بجلی کا کہنا ہے کہ تحقیقات سے مطمئن نہیں۔ وزارت نے نیپرا کو کثیر سالہ ٹیرف کی کوتاہیوں اور دیگر قانونی دشواریوں کو دور کرنے کا کہا تھا۔
یاد رہے کہ نیپرا نے کے الیکٹرک کو سنہ 2014 میں اوور بلنگ پر کلین چٹ دی تھی۔ وزارت پانی و بجلی کا کہنا ہے کہ اوور بلنگ سے کراچی کے صارفین کو مہنگی بجلی خریدنی پڑی، ان سے اربوں روپے زائد وصول کیے گئے۔
وزارت پانی و بجلی کا کہنا تھا کہ ناجائز منافع خوری کو روکنا قومی مفاد میں ہے۔ وزارت پانی و بجلی کی جانب سے کے الیکٹرک کی زائد منافع خوری اور خراب کارکردگی کا احتساب نہ ہونے کی نشاندہی کی گئی تھی۔
