اسلام آباد : نیپرا نے سہہ ماہی ایڈجسٹمنٹ کی تحت بجلی 50 پیسے فی یونٹ مہنگی کرنے کی منظوری دیدی۔
تفصیلات کے مطابق نیپرا نے بجلی کمپنیوں کی جانب سے رواں مالی سال کی دوسری سہہ ماہی ایڈجسٹمنٹ میں صارفین سے سترہ ارب روپے سے زائد وصول کرنے کی درخواست پرسماعت کی۔
کمپنیوں کی درخواست پر سماعت مکمل ہونے پر نیپرا نے سہ ماہی ایڈجسٹمنٹ کے تحت بجلی 50 پیسے فی یونٹ مہنگی کرنے کی منظوری دے دی۔
نیپرا اتھارٹی اعدادوشمار کا جائزہ لینے کے بعد تفصیلی فیصلہ جاری کرے گی۔
پاور ڈویژن نے کہا کہ ہماری درخواست ہے کہ اس اضافے کو جلدی نافذ کریں تاخیر نہ کریں، جس پر نیپرا حکام نے کہا کہ 3روپے 58پیسے کی ایڈجسٹمنٹ پہلے لاگو ہے، 3روپے سے زائد سرچارج کی درخواست بھی آئی ہوئی ہے۔
چیئرمین نیپرا کا کہنا تھا کہ یہ تو زیادہ ہوجائے گا ایک ماہ میں تو صارفین پر ایسا ظلم نہ کریں ، اس سہ ماہی میں ٹرانسمیشن چارجز ایڈجسٹمنٹ کا فرق زیادہ آیا ہے، اگر یہ چارجز نہ ہوتے تو اس رقم میں سے 11 ارب روپے کم ہوجاتے۔
انھوں نے مزید کہا کہ پیسکو کے کیپسٹی چارجز منفی میں ہیں، پیسکو کا صارف شکایت کرتا ہے کہ لوڈشیڈنگ ہورہی ہے، پیسکو کہہ رہی ہے کہ پوری بجلی استعمال نہیں کر رہی توپھر کہیں تو گڑ بڑ ہے۔
نیپرا نے پیسکو سے پوری صلاحیت کے مطابق بجلی استعمال نہ کرنے پر رپورٹ طلب کرلی ۔
