اسلام آباد : گھریلو صارفین کو بجلی کے اضافی استعمال پر فی یونٹ کتنی بچت ہوگی ؟ اس حوالے سے بڑی خوشخبری آگئی۔
تفصیلات کے مطابق نیشنل الیکٹرک پاور ریگولیٹری اتھارٹی (نیپرا) نے بجلی صارفین کے لیے حکومتی ونٹر پیکج پر عوامی سماعت مکمل کر لی ہے، جس کا مقصد گھریلو اور صنعتی صارفین کو نمایاں بچت فراہم کرنا ہے۔
نیپرا اتھارٹی ڈیٹا کی جانچ پڑتال کے بعد فیصلہ جاری کرے گی ، حکومتی ونٹر پیکج کی مدت 3 ماہ دسمبر تا فروری ہوگی۔
نیپرا کے چیئرمین وسیم مختار کی سربراہی میں ہونے والی سماعت میں سرمائی ڈیمانڈ انیشیٹو مالی سال 2025 کا جائزہ لیا گیا، جس کی اقتصادی رابطہ کمیٹی (ای سی سی) پہلے ہی منظوری دے چکی ہے، یہ اقدام سبسڈی سے غیر جانبدار رہنے کے لیے ڈیزائن کیا گیا ہے اور گیس کی کھپت کو کم کرتے ہوئے سسٹم کی پیداواری صلاحیت کے زیادہ سے زیادہ استعمال پر توجہ مرکوز کی گئی ہے۔
ونٹر پیکج کے تحت گزشتہ سال کے مقابلے میں اضافی یونٹ کی قیمت 26 روپے 7 پیسے ہوگی، جس میں گھریلو صارفین کو کم سے کم اضافی استعمال پر 30 فیصد یعنی 11 روپے 42 پیسے فی یونٹ بچت ہوگی۔
پیکج کے تحت گھریلو صارفین کو زیادہ سے زیادہ استعمال پر 26 روپے فی یونٹ اور صنعتی صارفین کوبجلی کےکم سےکم اضافی استعمال پر 5 روپے 72 پیسے فی یونٹ بچت ہوگی۔
بجلی کے زیادہ سے زیادہ اضافی استعمال پر 15 روپے 5 پیسے فی یونٹ کی بچت ہوگی۔
نیپرا نے توانائی کے شعبے میں موثر اصلاحات کے ساتھ استطاعت کے توازن کے لیے اپنے عزم پر زور دیا ہے، اسٹیک ہولڈرز کو تحریری تاثرات جمع کرانے کے لیے مدعو کیا گیا ہے، جس کا حتمی فیصلہ جاری کرنے سے پہلے مزید ڈیٹا کے تجزیہ کے ساتھ جائزہ لیا جائے گا۔
نیپرا کا مقصد یہ یقینی بنانا ہے کہ پیکیج موسم سرما کے دوران توانائی کی طلب کو مستحکم کرتے ہوئے صارفین کو ریلیف فراہم کرنے کے اپنے مقاصد کو حاصل کرے۔
