اسلام آباد: کے الیکٹرک کے رائٹ آف کلیمز پر نیپرا میں سماعت کے دوران صارفین نے شکایات کے انبار لگا دیے۔
اے آر وائی نیوز کے مطابق کے الیکٹرک کے رائٹ آف کلیمز پر نیپرا میں سماعت کے دوران صارفین نے کہا کہ کراچی میں کاروبار کرنا ناممکن ہوگیا ہے، بجلی کی لاگت سے سیکڑوں فیکٹریاں بند ہوگئیں اور مزید بند ہورہی ہیں۔
صارف نے کہا کہ کراچی کے صارفین سے سرکلر ڈیٹ کے خاتمے کا سرچارج وصول کیا جارہا ہے، رائٹ آف کلیمز یا کسی اور مد میں مزید بوجھ مسترد کرتے ہیں۔
کے الیکٹرک صارف نے کہا کہ اضافی سرچارج عائد کرنے سے شہر میں امن و امان کے مسائل پیدا ہوں گے۔
صارف نے سوال کیا کہ کے الیکٹرک کی نجکاری کا مقصد کیا تھا کیا وہ حاصل ہوگیا؟ کے الیکٹرک مہنگی بجلی پیدا کررہی ہے اور ٹیرف ڈفرنشل سبسڈی لے رہی ہے۔
صارف کا کہنا ہے کہ کے الیکٹرک کو تمام مارجن دینے کے بعد بھی رائٹ آف کلیمز کم نہیں ہورہے۔
