تل ابیب: اسرائیل کے وزیر اعظم نیتن یاہو بھارتی وزیر اعظم نریندر مودی کے نقش قدم پر چل پڑے ہیں، اور ایران کے عوام کو گمراہ کرنے کی ناکام کوشش کر رہے ہیں۔
تفصیلات کے مطابق پاک بھارت جنگ کے دوران نریندر مودی نے پاکستانی عوام کو فوج کے خلاف کرنے کی ناکام کوشش کی تھی، اسی طرح نیتن یاہو نے بھی ایرانی عوام کو حکومت کے خلاف کرنے کی ناکام کوشش کی ہے۔
گزشتہ روز نیتن یاہو نے ایرانی عوام کے نام ایک پیغام میں کہا کہ لڑائی ایرانی عوام سے نہیں بلکہ حکمراں آمریت کے خلاف ہے، انھوں نے کہا ہمارا ہدف ایرانی عوام نہیں بلکہ ان کا جابرانہ نظام ہے۔
اسرائیلی وزیر اعظم نے مزید کہا کہ اسلامی حکومت 50 سال سے ایرانی عوام کو ظلم کا نشانہ بنا رہی ہے، یہ حکومت اسرائیل کی تباہی کی دھمکیاں دے رہی ہے، ہماری جنگ عوام سے نہیں، دہشت گردی اور جبر سے ہے، مشرق وسطیٰ کا مستقبل امن اور خوش حالی کا ہونا چاہیے۔ انھوں نے کہا ہم امید کرتے ہیں مشرق وسطیٰ میں امن و خوش حالی کا دن جلد آئے گا۔
اسرائیلی وزیراعظم نیتن یاہو کا ایرانی عوام کے نام پیغام
خیال رہے کہ اسرائیلی وزیر اعظم بنجمن نیتن یاہو نے اپنے بھارتی ہم منصب نریندر مودی سے ٹیلی فون پر رابطہ کر کے انھیں ایران کے خلاف فوجی کارروائیوں کے بارے میں آگاہ کیا ہے، جس سے دونوں ممالک کے درمیان قریبی ہم آہنگی کا پتا چلتا ہے۔
واضح رہے کہ اسرائیل نے جمعہ کی صبح ایران میں درجنوں مقامات پر فضائی حملے کیے، جس میں جوہری مقامات، جوہری سائنس دانوں اور فوجی سربراہوں کو نشانہ بنایا گیا۔ ایران کی مسلح افواج کے چیف آف اسٹاف میجر جنرل محمد باقری سمیت کئی اعلیٰ فوجی عہدے دار، اور 6 جوہری سائنس دان بھی شہید ہوئے ہیں۔
دوسری طرف ایران کی جانب سے اسرائیل پر میزائل داغنے کا سلسلہ وقفے وقفے سے جاری ہے، اور اب تک اسرائیلی پولیس نے ایک شہری کی ہلاکت کی تصدیق کی ہے، جب کہ 41 اسرائیلی زخمی ہوئے ہیں۔
