تل ابیب: حماس کے سربراہ یحییٰ سنوار کی شہادت کے بعد حزب اللہ نے اسرائیلی وزیر اعظم نیتن یاہو کی رہائش گاہ پر ڈرون حملہ کر دیا ہے۔
الجزیرہ کے مطابق اسرائیلی وزیر اعظم کے دفتر کا کہنا ہے کہ نیتن یاہو کی رہائش گاہوں میں سے ایک کو حزب اللہ نے ڈرون حملے سے نشانہ بنا دیا ہے۔
حکام کا کہنا ہے کہ حملے کے وقت اسرائیلی وزیر اعظم اور ان کا خاندان گھر میں موجود نہیں تھے، اور اس میں کوئی زخمی نہیں ہوا، ڈرون لبنان سے لانچ کیا گیا تھا اور قیصریہ میں وزیر اعظم کے گھر سے ٹکرا گیا تھا۔
اسرائیلی فوج کا کہنا ہے کہ پولیس حملے کی جگہ کا پتا لگانے کے لیے پہنچ گئی ہے، ڈرون حملے کے عین وقت پر تل ابیب میں سائرن بھی بجنا شروع ہو گئے تھے، اور اسی وقت لانچ کیے گئے دو دیگر ڈرونز کو روکا بھی گیا۔
حماس نے یحییٰ سنوار کی شہادت کی تصدیق کر دی
دوسری طرف یحییٰ سنوار کے قتل کے بعد حماس کا کہنا ہے کہ اسرائیلی قیدیوں کو اب تب تک رہا نہیں کیا جائے گا، جب تک غزہ پر جارحیت بند نہیں ہوتی، اور اسرائیلی افواج مکمل طور پر غزہ سے واپس نہیں چلی جاتیں، اور اسرائیل میں قید فلسطینی قیدیوں کو رہا نہیں کیا جاتا۔
واضح رہے کہ شمالی غزہ کے جبالیہ اور مجازی پناہ گزین کیمپوں پر اسرائیلی حملے جاری ہیں، جن میں کم از کم 44 فلسطینی شہید اور 80 سے زائد زخمی ہو گئے ہیں، اسرائیلی فورسز نے شمالی غزہ میں العودہ اور کمال عدوان اسپتالوں کو بھی نشانہ بنایا۔
