انقرہ: ترک صدر رجب طیب اردوان نے نیتن یاہو کو سائیکوپیتھ اور ویمپائر قرار دے دیا۔
غیر ملکی میڈیا رپورٹس کے مطابق ترکیہ کے مرکزی شہر انقرہ میں پارٹی اجلاس سے خطاب میں کرتے ہوئے ترک صدر اردوان نے کہا کہ روز فلسطینی شہدا کی لاشیں سڑکوں پر بکھری ہوتی ہیں، نیتن یاہو ایک سائیکو پیتھ اور ویمپائر ہے، جو خون پر پلتا ہے۔
انھوں نے کہا اسرائیلی دہشت گرد فلسطینیوں کی حرمت کو پامال کر رہے ہیں، بچوں کو ذبح کیا جا رہا ہے، لوگوں کو خیموں میں جلایا جا رہا ہے، ایسے میں مسلم دنیا کب متحد ہوگی؟
رجب طیب اردوان نے سوال اٹھایا کہ او آئی سی ان مظالم کے خلاف کب مؤثر پالیسی اپنائے گی؟ اسرائیل صرف غزہ کے لیے خطرہ نہیں بلکہ پوری انسانیت کے لیے خطرہ ہے۔
غزہ میں قتل عام پر اسرائیل کے خلاف مشترکہ کارروائی کرنے اور مظالم رُکوانے میں ناکامی پر انھوں نے اسلامی تعاون تنظیم کو بھی کڑی تنقید کا نشانہ بنایا۔
انھوں نے امریکا اور یورپی ممالک کے سربراہان پر بھی تنقید کی، اور کہا ’’اے امریکی ریاست، اس کا خون اسرائیل کے ساتھ ساتھ تمھارے ہاتھوں پر بھی ہے، تم بھی اس نسل کشی کے برابر ذمہ دار ہو، اے یورپی ریاست اور سربراہان حکومت، تم اسرائیل کی اس نسل کشی، بربریت اور ویمپائر جیسے عمل میں پارٹی ہو، کیوں کہ تم خاموش ہی رہے۔‘‘
