کراچی: اے آر وائی ڈیجیٹل پر آج رات نیا ڈرامہ سیریل ’’رسمِ دُنیا‘‘ پیش کیا جارہا ہے، ڈرامے میں سمیع خان، ارمینہ اور بلال مرکزی کرداروں میں رسمِ دُنیا‘ نبھاتے ہوئے نظر آئیں گے، جاوید شیخ اور ثمینہ پیرزادہ بھی نمایاں ہیں۔
تفصیلات کے مطابق اے آروائی ڈیجیٹل اپنے ناظرین کے لیے نئی ڈرامہ سیریل ’’رسمِ دُنیا‘‘ لارہا ہے، جو آج رات 8 بجے پیش کیا جائے گا۔ ڈرامے کا ٹیژر پہلے ہی ریلیز کیا جاچکا ہے جبکہ ڈرامے کے لیے علی عظمت کا گایا ہوا گانا ’’کہاں ہوں میں یہ کیا پتہ۔۔۔۔۔ کبھی جلا کبھی بجُھا‘‘ مقبول ہورہا ہے۔
ڈرامے کی ہدایت کاری ذیشان انصاری اور رومی انشا نے نہایت خوبصورت انداز سے کی ہے۔ ڈرامے کی کہانی آرمینہ، سمیع اور بلال کے گرد گھومتی ہے، سمیع اور بلال بھائیوں کے کردار میں نظر آئیں گے، سمیع خان کو منفی کردار میں دکھایا گیا ہے جو شادی کے بعد آرمینہ پر بے جا تنقید کرتے نظر آرہے ہیں، جبکہ بلال آرمینہ سے محبت کا دم بھرتے ہیں۔
ڈرامے کا ٹائٹل سانگ علی عظمت کی آواز میں ریکارڈ کیا گیا ہے جس کی موسیقی وقارعلی نے ترتیب دی ہے۔
گزشتہ روز ندا یاسر کے پروگرام ’’گُڈ مارننگ پاکستان‘‘ میں سمیع خان کا کہنا تھا کہ ڈرامہ میں جاوید شیخ اور ثمینہ پیرزادہ کا کردار دیکھنے سے تعلق رکھتا ہے، یہاں یوں کہہ لیں کہ مذکورہ سیریل میں خوبصورتی کے اوورڈوز آپ کو نظر آئیں گے،
واضح رہے کہ بلال کا اے آر وائی ڈیجیٹیل پر یہ پہلا ڈرامہ ہے، جبکہ سمیع خان اورارمینہ متعدد بار ڈراموں میں اداکاری کے جوہر دکھا چکے ہیں۔