خواتین کے عالمی دن کے حوالے سے خواتین کھلاڑیوں کو خراج تحسین پیش کرنے کے لیے ان سے ملتی جلتی باربی گڑیائیں متعارف کروا دی گئیں۔
مشہور ٹوائے کمپنی میٹل نے حال ہی میں باربی کے پیش کیے جانے والے نئے کلیکشن میں خواتین کھلاڑیوں کے ماڈل پیش کیے ہیں۔
ان میں سے ایک گڑیا برطانوی اسپرنٹر ڈینا ایشر اسمتھ کی بھی ہے۔ ڈینا نے گزشتہ برس دوحہ میں 200 میٹرز ریس میں گولڈ میڈل جیتا تھا۔
ان کے علاوہ کلیکشن میں فرانس کی خواتین کی فٹبال ٹیم کی کپتان اور یوکرین کی ورلڈ چیمپئن پلیئر بھی شامل ہیں۔
باربی کی یہ نئی گڑیائیں ڈریم گیپ پروجیکٹ کے تحت پیش کی گئی ہیں جس کا مقصد ان عوامل کی نشاندہی کرنا ہے جو بچیوں اور لڑکیوں کی راہ میں ان کے ارادوں کی تکمیل میں رکاوٹ بنتے ہیں۔
اس موقع برطانوی اسپرنٹر ڈینا نے مسرت کا اظہار کرتے ہوئے کہا کہ باربی کے ساتھ کام کرنا ان کے لیے ایک اعزاز ہے اور وہ خوش ہیں کہ اس گڑیا کے ذریعے وہ آنے والی نسلوں کو متاثر کرسکیں گی۔
وہ کہتی ہیں خواتین کا کھیل کے شعبے میں ہونا ایک چیلنج ہے کیونکہ انہیں وہ توجہ اور مراعات نہیں ملتے جو مرد کھلاڑیوں کو ملتے ہیں۔
باربی کی گلوبل ہیڈ لیزا مک نائٹ کا کہنا ہے کہ اس کلیکشن کو پیش کرنے کا مقصد طاقتور اور متنوع رول ماڈلز کو پیش کرنا اور اس کے ذریعے نوجوان لڑکیوں کی خود اعتمادی میں اضافہ کرنا اور انہیں تعصب کے خلاف لڑنے میں مدد دینا ہے۔
