ٹوکیو: جاپان میں زیر آب آتش فشاں پھٹنے سے سمندر میں ایک نیا جزیرہ نمودار ہو گیا ہے جو ہلال کی مانند ہے۔
تفصیلات کے مطابق جاپان کے جنوب میں زیر آب آتش فشاں پھٹنے سے ٹوکیو سے 12 سو کلومیٹر دور سمندر میں ایک مکمل طور پر نیا ہلال نما جزیرہ بن گیا ہے۔
یہ نیا جزیرہ ہلال کی مانند ہے، جسے نجیما (Niijima) کا نام دیا گیا ہے، جس کا مطلب بھی نیا جزیرہ ہے، یہ قطر میں 0.6 میل ہے، اور سلفر آئی لینڈ سے محض 5 کلومیٹر دوری پر ہے۔
ماہرین کا کہنا ہے کہ اس جزیرے کی تشکیل فوکوٹوکو اوکانوبا (Fukutoku-Okanoba) آتش فشاں پھٹنے سے ہوئی ہے، یہ ایک زیر آب آتش فشاں ہے جو پہلی بار 1904 میں دریافت کیا گیا تھا۔
دس برس بعد یہ آتش فشاں ایک بار پھر 12 اگست کو پھوٹنا شروع ہوا تھا، اور ابھی چند دن قبل اسے جاپان کوسٹ گارڈ نے دریافت کیا۔
اگرچہ اس جزیرے کی خبریں بہت زور و شور سے پھیل رہی ہیں، تاہم جاپان کی موسمیاتی ایجنسی نے کہا ہے کہ یہ جزیرہ عارضی بھی ہو سکتا ہے، کیوں کہ فوکوٹوکو اوکانوبا آتش فشاں میں پھٹنے کا عمل ابھی بھی جاری ہے۔
جاپان کوسٹ گارڈ نے آتش فشانی سرگرمی کی وجہ سے تمام بحری جہازوں کو تنبیہ جاری کی ہے کہ اس علاقے سے دور رہیں، کیوں کہ لاوے سے کوئی بھی حادثہ ہو سکتا ہے۔
ماہرین کا یہ بھی کہنا ہے کہ اس نئے جزیرے میں لاوے کے بہاؤ سے پائیدار کوٹنگ ہو سکتی ہے، اور اگر آتش فشانی سرگرمی جاری رہی تو یہ بھی طویل عرصے تک موجود رہے گا۔
