ریاض: سعودی محکمہ تعلیم کی جانب سے فیصلہ کیا گیا ہے کہ اب بچوں کو پہلی کلاس سے انگریزی کی تعلیم دی جائے گی، اس وقت طالب علموں کو چوتھی کلاس سے انگلش پڑھائی جاتی ہے۔
تفصیلات کے مطابق یہ فیصلہ سعودی عرب کے وزیرتعلیم ڈاکٹر حمد آل الشیخ کی جانب سے سامنے آیا۔ محکمہ تعلیم نے نئے نصاب پر کام شروع کردیا، دو سال بعد پہلی کلاس سے انگریزی لازمی قرار دی جائے گی۔
مقامی میڈیا کو انٹرویو دیتے ہوئے ڈاکٹر حمد آل الشیخ کا کہنا تھا کہ بچوں کو چوتھی کلاس سے انگریزی کی تعلیم دینے کا پلان غلط ثابت ہوا اور اس کے منفی نتائج سامنے آئیں۔ اسی کے پیش نظر اب بچوں کو پہلی کلاس سے انگریزی کی تعلیم دینے پر غور کررہے ہیں۔
انہوں نے کہا کہ دو سال بعد سعودی عرب کے تمام سرکاری اسکولوں میں پہلی جماعت سے انگریزی لازمی ہوگی۔
وزیرتعلیم کا کہنا تھا کہ نصاب کا جائزہ لینے والی کمیٹی معاملے کو سنجیدگی سے دیکھ رہی ہے، اور نئے نصاب کی تیاری پر بھی کام جاری ہے، دنیا کی ترقی، وقت اور حالات کو مدنظر رکھتے ہوئے نیا نصاب تیار کیا جارہا ہے جس میں تھوڑا وقت تو لگے گا۔ امید ہے مثبت اور پہلے سے بہتر نتائج سامنے آئیں گے۔
