کراچی: صوبہ سندھ کے دارالحکومت کراچی میں بجلی کے تقسیم کار ادارے کے الیکٹرک نے 10 ہزار نئے الیکٹرک پولز کی تنصیب مکمل کرلی، ایک کھمبے کو ہٹانے کے دوران اس کے اندر سے اسلحہ بھی برآمد ہوا۔
تفصیلات کے مطابق کراچی میں بجلی کے تقسیم کار ادارے کے الیکٹرک نے بڑا قدم اٹھاتے ہوئے شہر کے مختلف علاقوں میں پرانے کھمبے ہٹا کر 10 ہزار نئے کھمبوں کی تنصیب مکمل کرلی۔
کے الیکٹرک کا کہنا ہے کہ اس اقدام کا مقصد صارفین کو محفوظ اور بلا تعطل بجلی کی فراہمی کو یقینی بنانا ہے۔
کمپنی نے اب تک اپنے پروگرام کے تحت 10 ہزار سے زیادہ کھمبے نصب کردیے ہیں جبکہ پرانے اور غیر استعمال شدہ کھمبوں کو ہٹانے کا عمل جاری ہے، اس کوشش میں کے الیکٹرک کو مزاحمت کا سامنا بھی کرنا پڑ رہا ہے کیونکہ کچھ عناصر ان کھمبوں کو غیر قانونی طور پر اپنے مذموم مقاصد کے لیے استعمال کر رہے ہیں۔
ترجمان کے الیکٹرک کے مطابق کے الیکٹرک نے صرف ایک دن میں 800 کھمبے ہٹائے، ایسی ایک کوشش کے دوران جب ایک کھمبے کو ہٹایا گیا تو کے الیکٹرک کی مقامی ٹیم کو اندر ایک پوشیدہ بندوق ملی جس کی اطلاع کے الیکٹرک کی ٹیم نے فوری طور پر پولیس کو دی۔
کے الیکٹرک نے اپنے انفرا اسٹرکچر کے غلط استعمال پر تشویش کا اظہار کرتے ہوئے متعلقہ اداروں اور شہری انتظامیہ سے اپیل کی کہ ادارے کی معاونت جاری رکھی جائے تاکہ کے الیکٹرک کے انفرا اسٹرکچر کے غلط استعمال کو روکا جا سکے۔
