کراچی : نیوگولیمار میں فائرنگ سے 15 سالہ طالب علم ایان کے زخمی ہونے کا مقدمہ درج کرلیا گیا، جس میں اہم انکشاف سامنے آیا کہ گرفتارملزم صفدرپولیس اہلکارنہیں بلکہ پولیس کامخبر نکلا۔
تفصیلات کے مطابق کراچی میں نیوگولیمار فائرنگ کیس نیا رخ لینے لگا، اہکاروں کی فائرنگ سے 15 سالہ طالب علم ایان کے زخمی ہونے کا مقدمہ رضویہ تھانے میں اقدام قتل کی دفعہ کے تحت درج کرلیا گیا ہے۔
مقدمہ زخمی ایان کے چچا نعمان کی مدعیت میں 3 ملزمان کے خلاف درج ہوا ، ایف آئی آر میں ایک اور بڑا انکشاف سامنے آیا کہ گرفتار ملزم صفدر پولیس اہلکار نہیں بلکہ پولیس انفارمر نکلا۔
پولیس حکام نے بتایا کہ گرفتار ملزم صفدر عرصہ دراز سے پولیس مخبر طور پر کام کرتا ہے، ملزم کبھی ایس آئی یو تو کبھی دیگر یونٹس کے نام لیتا رہا، پولیس مخبر کے پرائیویٹ ساتھیوں میں فراز اور علی شامل ہیں۔
حکام کا کہنا تھا کہ وقوعہ کے روز ایس ایچ او کے احکامات پر اسنیپ چیکنگ جاری تھی، پولیس موبائل پر پولیس انفارمرز موجود تھے، ایس ایچ او کو ملزمان کی اطلاع ملی تھی جن کو پکڑنا تھا ، اسی دوران غلط فہمی کی وجہ سے یہ طالب علم ایان کو گولی لگی۔
زخمی طالبعلم ایان کے والد نے پولیس کارکردگی سے اطمینان کا اظہار کرتے ہوئے کہا کہ پولیس کی جانب سے ملزم کو بھی گرفتار کیا گیا، پولیس گرفتار ملزم کے خلاف سخت کارروائی کرے گی۔
پولیس حکام کے مطابق ایس ایس پی کی تشکیل کردہ ٹیم نے ایک اور ملزم گرفتار کرلیا ، پولیس کو آخری پرائیویٹ ملزم کی تلاش جاری ہے۔
گذشتہ روز پندرہ سال کے ایان پراہلکاروں نے اس وقت فائرنگ کی جب وہ دوست کے ساتھ سحری کا سامان لینے جا رہا تھا اور بعد ازاں پولیس نے جرم چھپانے کے لیے نوجوانوں کو ڈکیت ظاہر کیا تھا۔
بعد ازاں ایس ایس پی سینٹرل نے اہلکاروں کی فائرنگ سے طالبعلم زخمی ہونے کے معاملے پر پولیس کی غلطی کا اعتراف کرتے ہوئے کہا تھا کہ نیوگولیمار پر فائرنگ کا واقعہ پولیس مقابلہ نہیں تھا، اہلکاروں سے غلطی ہوئی، واقعے پر افسوس ہے، پولیس کی غفلت کو منظرعام پر لائیں گے۔
ایس ایس پی سینٹرل کا کہنا تھا کہ ڈی آئی جی ویسٹ نے انکوائری کمیٹی بنائی ہے، ابتدائی معلومات کے مطابق صفدر نامی اہلکار نے فائرنگ کی ہے۔
