واشنگٹن : امریکا کی نئی ٹرمپ انتظامیہ نے نیو میڈیا کو وائٹ ہاؤس بریفنگ میں شرکت کی اجازت دے دی ہے۔ نشستیں بھی مختص کردی گئیں۔
غیر ملکی میڈیا رپورٹس کے مطابق وائٹ ہاؤس نے ایک نئی پالیسی متعارف کروائی ہے جس کے تحت "نیو میڈیا” آؤٹ لیٹس اور مواد تخلیق کرنے والوں کو پریس بریفنگز کے دوران سوالات کرنے کے مواقع فراہم کیے جائیں گے۔
اس حوالے سے اعلان کیا گیا ہے کہ کانٹینٹ کریئٹرز، پوڈ کاسٹرز اور سوشل میڈیا انفلوئنسرز وائٹ ہاؤس بریفنگ میں شرکت کرسکیں گے۔
اس اقدام کا اعلان وائٹ ہاؤس کی پریس سکریٹری کیرولین لیویٹ نے اپنی پہلی بریفنگ میں کیا، ان کا کہنا تھا کہ نیو میڈیا کے لوگ بریفنگ میں سوالات بھی کرسکیں گے۔
پریس سیکریٹری وائٹ ہاؤس کیرولین لیویٹ نے کہا کہ آزاد صحافیوں، پوڈ کاسٹرز اور سوشل میڈیا انفلوئنسرز کا خیرمقدم کرتے ہیں۔
صحافیوں سے گفتگو کرتے ہوئے ان کا مزید کہنا تھا کہ نومنتخب صدر ڈونلڈ ٹرمپ نیومیڈیا منظر نامے کے مطابق اپنی انتظامیہ کی ازسر نوترتیب چاہتے ہیں۔
21یاد رہے کہ امریکی صدر ڈونلڈ ٹرمپ نے حلف برداری کے بعد سوشل میڈیا پر اپنا پہلا پیغام جاری کیا تھا جس میں انہوں نے بائیڈن دور کے چار عہدیداران کو برطرف کرنے کا اعلان کیا تھا۔
اپنے سوشل میڈیا نیٹ ورک ’ٹروتھ سوشل‘ پر جاری پیغام میں ان کا کہنا تھا کہ انہوں نے بائیڈن انتظامیہ کی جانب سے تقرر کیے جانے والے ان ایک ہزار سے زیادہ افراد کو برطرف کرنا شروع کردیا جو ان کے ’امریکہ کو عظیم بنانے کے نظریے سے متفق نہیں ہیں۔
