کراچی: ملک کے 3 بڑے ایئرپورٹس پر برطانیہ سے آنے والے جدید اسکینر نصب کردیے گئے جس کے بعد سیکیورٹی اور چیکنگ کا عمل مزید مؤثر ہوجائے گا۔
تفصیلات کے مطابق برطانیہ کی جانب سے پاکستانی ایئر پورٹس کے لیے جدید مشینیں فراہم کی گئی ہیں۔ جدید اسکینر سیکیورٹی کو مزید مؤثر بنانے کے لیے فراہم کی گئی ہیں۔
ذرائع کے مطابق برطانوی سیکیورٹی ایجنسی کی جانب سے فی الحال 18 اسکینر فراہم کیے گئے ہیں جنہیں 3 بڑے ایئر پورٹس، کراچی کے قائد اعظم انٹرنیشل، لاہور کے علامہ اقبال انٹرنیشنل اور وفاقی دارالحکومت اسلام آباد کے نیو اسلام آباد انٹرنیشل ایئرپورٹ پر نصب کردیا گیا ہے۔
مشینوں کے ذریعے نقصان دہ آلات اور بارودی مواد کی موجودگی جانچی جاسکے گی۔ مذکورہ اسکینر فی الحال کراچی، اسلام آباد اور لاہور سے برطانیہ جانے والی پروازوں کے لیے استعمال کیے جارہے ہیں۔
خیال رہے کہ رواں برس جولائی میں لاہور ایئرپورٹ کے اندر فائرنگ کا واقعہ پیش آیا تھا جس میں 2 افراد قتل ہوگئے تھے، ابتدائی انکوائری رپورٹ میں ایئر پورٹ کے واحد اسکینر کے 2 سال سے خراب ہونے کا انکشاف ہوا تھا۔
ذرائع کے مطابق ایئر پورٹ پر واحد اسکینر صرف ڈیپارچر لاؤنج تک جانے والی گاڑیوں کو اسکین کرتا رہا، پارکنگ ایریا میں جانے والی گاڑیوں کو چیک کرنے کے لیے کوئی اسکینر نہیں تھا۔
اے ایس ایف ذرائع کے مطابق اسکینر خراب ہونے کے باعث گاڑیوں کی اسکیننگ نہیں ہو رہی تھی، سول ایوی ایشن اتھارٹی (سی اے اے) کو ہر ماہ اسکینر کی خرابی سے متعلق آگاہ کیا جاتا رہا، آگاہ کرنے کے باوجود اسکینر کو ٹھیک نہ کروایا گیا۔
