ابوظبی: متحدہ عرب امارات کی ریاست ابوظبی میں گاڑیوں کے درمیان مناسب فاصلہ نہ رکھنے والے ڈرائیورز پر جرمانہ عائد کیا جائے گا۔
غیرملکی خبررساں ادارے کی رپورٹ کے مطابق ابوظبی پولیس نے گاڑیوں کے مالکان کو خبردار کیا ہے کہ وہ ڈرائیونگ کے دوران گاڑیوں کے درمیان مناسب فاصلہ رکھ کر چلیں بصورت دیگر ان پر جرمانہ عائد کیا جائے گا۔
ابوظبی محکمہ ٹریفک کے مطابق گاڑیوں کے درمیان فاصلہ نہ رکھنے پر 400 درہم جرمانہ ہوگا اور ڈرائیورز کے خلاف چار ٹریفک پوائنٹ ریکارڈ کرلیے جائیں گے۔
پولیس جرمانے کی اطلاع ایس ایم ایس کے ذریعے دے گی، خلاف ورزی دہرانے پر نئے جرمانے کی تنبیہ بھی کی جائے گی۔
ابوظبی پولیس نے گاڑیوں کے درمیان مقررہ فاصلے کی پابندی نہ کرنے والے ڈرائیورز کے خلاف کارروائی کے لیے ریڈار کی تنصیب شروع کردی ہے۔
رپورٹ کے مطابق 15 جنوری 2020 سے اسمارٹ سسٹم اور مختلف مقامات پر نصب ریڈار کے ذریعے خلاف ورزیاں کرنے والوں کا ریکارڈ حاصل کیا جائے گا۔
ابوظبی محکمہ ٹریفک کے ڈائریکٹر محمد علی ضاہی الحمیری نے کہا کہ ابوظبی پولیس اس حوالے سے آگاہی مہم چلائے گی، بعض ڈرائیور شاہراہوں اور عام سڑکوں پر ڈرائیونگ کے دوران گاڑیوں کے درمیان فاصلہ نہیں رکھتے۔
انہوں نے کہا کہ آگاہی مہم پانچ زبانوں میں چلائی جائے گی، سوشل میڈیا پر بھی ایس ایم ایس بھیجے جائیں گے، ڈرائیوروں کو گاڑیوں کے درمیان فاصلہ نہ رکھنے کے خطرات سے آگاہ کیا جائے گا۔
محمد علی ضاہی الحمیری نے کہا کہ حادثہ ہونے کی صورت میں متعدد گاڑیاں آپس میں ٹکرا جاتی ہیں، اس قسم کے واقعات سے بچاؤ کے لیے ہی گاڑیوں کے درمیان فاصلہ رکھنے کا قانون بنایا گیا ہے۔
