اسلام آباد : نئے مالی سال کے آغاز سے ہی عوام پر ٹیکسوں کی بھرمار کردی گئی، کون کون سی اشیاء پر ٹیکس دینا ہوگا؟۔
تفصیلات کے مطابق مالی سال 2024-25 کیلئے فنانس بل 2024 کے تحت نئے ٹیکسز کا اطلاق آج سے ہوگیا، فکسڈ ٹیکس کی بجائے مالیت کے لحاظ سے ٹیکس عائد کردیا گیا۔
مالی سال کے آغاز پر ہی عوام پر ٹیکسوں کی بھرمار کرکے سبزیوں ،پھلوں اوردیگرضروریات زندگی پر ٹیکس لگا دیا گیا۔
زندہ مرغی اور زندہ مچھلی کی درآمد پر دس فیصد ڈیوٹی عائد کردی گئی جبکہ پٹرول اور ڈیزل پر 10 فیصد، قدرتی گیس کی درامد پر 5 فیصد، منرل واٹر پر 30 فیصد، کافی پر 40 فیصد، دودھ پر 25 فیصد ڈیوٹی لگائی گئی ہے۔
نئے ٹیکسز کے مطابق سبزیوں پر 10 فیصد، دہی پر 20 فیصد، چیز پر50 فیصد، شہد پر30 فیصد درامدی ڈیوٹی عائد کر دیا گیا، کیلے پر 10 فیصد، مالٹا پر 15 فیصد، سیب پر 15 فیصد، فروٹس اینڈ نٹس پر 30 فیصد درامدی ڈیوٹی لگائی گئی ہے جبکہ ٹماٹر پر 20 فیصد، آلو پر 35 فیصد درآمدی ڈیوٹی عائد کردی گئی۔
کھجور پر 25 فیصد، چیریز پر 30 فیصد، مکئی پر 30 فیصد، گندم کے آٹے پر 25 فیصد درامدی ڈیوٹی عائد، میدے پر 25 فیصد، پاستا 20 فیصد، کیک، بسکٹس پر 20 فیصد ڈیوٹی عائد کردی گئی۔
شیرخوار بچوں کے ڈبہ بند دودھ پر بھی 18 فیصد جی ایس ٹی عائد کردی گئی ہے۔دودھ کےعام پیکٹ پر بھی 18 فیصد جی ایس ٹی دینا ہوگا، موبائل فونز کی خریداری پر بھی 18 تا 25 فی صد تک جی ایس ٹی عائد کی گئی ہے۔
