کیلیفورنیا : شمالی لاس اینجلس میں بدھ کے روز بھڑکنے والی آگ رکنے کا نام نہیں لے رہی، آگ کی شدت کا اندازہ اس بات سے لگایا جاسکتا ہے کہ اس نے مزید 5 مقامات کو اپنی لپیٹ میں لے لیا ہے۔
غیر ملکی خبر رساں ادارے کی رپورٹ کے مطابق کیلیفورنیا میں گزشتہ ہفتے لگنے والی آگ تیزی سے پھیل کر مزید 9 ہزار 400 ایکڑ (38 مربع کلومیٹر) سے زیادہ علاقے تک پھیل چکی ہے۔
مقامی انتظامیہ کی جانب سے اس آگ کو لگونا،سیپول ویڈا، گبل، گلمین اور بارڈر ٹو کا نام دیا گیا، جو لاس اینجلس، سان ڈیاگو، وینٹورا اور ریور سائیڈ کی کاؤنٹیوں میں بھڑک اٹھی ہے۔
آگ کے پھیلنے کی وجہ تیز ہوائیں اور خشک جھاڑیاں قرار دی جارہی ہیں جس کے نتیجے میں 31ہزار سے زائد مقامی رہائشیوں کو علاقے سے انخلاء کے احکامات جاری کیے گئے ہیں۔
یہ آگ ان فائر فائٹرز کے لیے مزید چیلنج بن گئی ہے جنہوں نے پہلے میٹرو پولیٹن کے علاقے میں لگنے والی بڑی آگ کو بہت مشکل سے قابو کیا تھا۔
یاد رہے کہ امریکی ریاست کیلیفورنیا میں گزشتہ چند ہفتوں کے دوران لگنے والی آگ کی تباہیاں جاری ہیں، پیلیسیڈس اور ایٹن میں لگنے والی آگ نے مجموعی طور پر 37 ہزار ایکڑ سے زائد رقبے جلا کر خاکستر کر دیا جس میں کم از کم 28 افراد ہلاک ہوئے۔
مذکورہ آتشزدگی سے تقریباً 16ہزار عمارتوں کو شدید نقصان پہنچا ان میں سے کچھ عمارتیں تباہ ہوگئیں، اب تک مجموعی طور پر 1 لاکھ 80ہزار افراد کو انخلا کے احکامات دیے جاچکے ہیں۔
اس حوالے سے پیش گوئی کرنے والے ادارے ایکیو ویدر نے اپنی رپورٹ میں کہا ہے کہ اس سانحے سے ہونے والے مالی نقصان کا تخمینہ 250ارب ڈالر سے زیادہ ہو سکتا ہے۔
لاس اینجلس کاؤنٹی کے فائر چیف انتھونی مارونے نے میڈیا کو بتایا کہ ریڈ فلیگ وارننگ کے نتیجے میں تقریباً 11سو فائر فائٹرز کو جنوبی کیلیفورنیا میں تعینات کیا گیا، اور 4ہزار سے زائد فائر فائٹرز ہیوگس فائر پر کام کر رہے ہیں۔
مزید پڑھیں : لاس اینجلس میں لگی آگ انشورنس کمپنیوں کے سر کا درد بن گئی
امریکی ریاست کیلیفورنیا کے شہر لاس اینجلس میں لگی آگ سے انشورنس کمپنیوں کے لیے سب سے مہنگی آگ بن گئی، جس کی وجہ سے انشورنس کمپنیوں کے نقصانات کا تخمینہ اربوں ڈالر تک پہنچ گیا۔
