کراچی کے مختلف علاقوں میں ہوائی فائرنگ سے24افراد زخمی ہوگئے جن میں 19 مرد،2 خواتین اور 3 بچے شامل ہیں، زخمیوں کو طبی امداد کے لئے اسپتال منتقل کر دیا گیا۔
اے آر وائی نیوز کی رپورٹ کے مطابق سال نو کے آغاز پر کراچی میں رات بجتے ہی مختلف علاقوں میں ہوائی فائرنگ کا سلسلہ شروع ہوگیا، جس کے نتیجے میں اب تک 24 افراد کے زخمی ہونے کی اطلاعات ہیں۔
ریسکیو حکام کا کہنا ہے کہ کراچی کے علاقے لیاقت آباد میں ہوائی فائرنگ سے3افراد زخمی ہوئے۔ طارق روڈ، شاہ فیصل کالونی میں فائرنگ سے2خواتین اور اورنگی ٹاؤن، گلشن اقبال میں ہوائی فائرنگ سے2افراد زخمی ہوئے۔
اس کے علاوہ عزیزآباد میں ہوائی فائرنگ سے ایک بچہ، گلزار ہجری اور کورنگی نمبر6میں 2افراد جبکہ لیاری اور آرام باغ میں ہوائی فائرنگ سے 3افراد کے زخمی ہونے کی اطلاعات موصول ہوئی ہیں۔
ریسکیو حکام کے مطابق آگرہ تاج اور ڈینسوہال میں ہوائی فائرنگ سے 2افراد جبکہ نارتھ کراچی، ایف بی ایریا، ملیر، لانڈھی، نشتر روڈ میں ہوائی فائرنگ سے 5افراد کے زخمی ہونے کی اطلاعات ہیں۔
