نیویارک: یو این کوپ کانفرنس کے موقع پر محسن نقوی کی اپنے چینی ہم منصب سے اہم ملاقات ہوئی ہے جس میں پاک چین تعلقات اور سیکیورٹی امور پر تفصیلی تبادلہ خیال کیا گیا۔
تفصیلات کے مطابق نیویارک میں یو این پیپلز ری پبلک آف چائنا کے مشن کے آفس میں وزیر داخلہ محسن نقوی کی پیپلز ری پبلک آف چائنا کے ہم منصب کیو آئی یانجن سے ملاقات ہوئی ہے، جس میں قانون نافذ کرنے والے اداروں اور چین کے تعاون کے حوالے سے بات چیت ہوئی، ملاقات میں ٹریننگ اور جدید آلات و ٹیکنالوجی کے استعمال کے بارے بھی گفتگو کی گئی۔
اس سلسلے میں جاری اعلامیے کے مطابق چین پاکستانی قانون نافذ کرنے والے اداروں کی ٹریننگ و استعداد کار بڑھانے کے لیے تعاون کرے گا، چینی ہم منصب نے اسلام آباد میں چینی شہریوں کی حفاظت کے لیے ایس پی یو کے قیام کے اقدام کو سراہا۔
کیو آئی یانجن نے ایس پی یو کی ٹریننگ اور دیگر امور میں بھرپور تعاون کی یقین دہانی کرائی، انھوں نے اس موقع پر کہا کہ پاکستان چین ہر موسم کے دوست ہیں، دوستی فولاد سے زیادہ مضبوط ہے۔
محسن نقوی نے داسو میں پیش آنے والے افسوس ناک واقعے پر ہونے والی پیش رفت سے آگاہ کیا، پیپلز ری پبلک آف چائنا کے ہم منصب نے کیس پر ہونے والی پیش رفت پر اطمینان کا اظہار کیا، کیو آئی یانجن نے کہا پاکستانی اداروں نے محنت اور پروفیشنل انداز میں اس کیس کو ٹریس کیا۔
انھوں نے محسن نقوی کو ستمبر میں چائنا میں ہونے والی گلوبل سیکیورٹی فورم میں شرکت کی دعوت بھی دی، جسے وزیر داخلہ نے قبول کر لیا اور شکریہ ادا کیا، محسن نقوی نے بھی اپنے ہم منصب کو پاکستان کے دورے کی دعوت دی، پیپلز ری پبلک آف چائنا کی وزارت داخلہ کا ایڈوائزی گروپ جلد پاکستان کا دورہ کرے گا۔
خیال رہے کہ محسن نقوی اور کیو آئی یانجن چوتھی یو این کوپ کانفرنس میں شرکت کے لیے نیویارک میں ہیں۔
