نیوزی لینڈ کرکٹ بورڈ نے اہم فیصلہ کرتے ہوئے سابق پاکستانی آف اسپنر ثقلین مشتاق کو پھر سے اپنے کوچنگ پینل کا حصہ بنا لیا ہے، وہ دورہ بنگلہ دیش میں کیوی ٹیم کے ساتھ ہوں گے۔
غیرملکی میڈیا رپورٹس کے مطابق کیوی کرکٹ بورڈ نے ایک بار پھر سے دوسرا کے موجد ثقلین مشتاق کی خدمات حاصل کرلی ہیں، سابق پاکستانی کوچ کیویز کو اسپن بولنگ کے گر سکھائیں گے، وہ بنگلہ دیش میں ٹیم کو جوائن کریں گے۔
نیوزی لینڈ کرکٹ بورڈ کا اپنے بیان میں کہنا تھا کہ پاکستان کے سابق مایہ ناز آف اسپنر کو دورہ بنگلا دیش کے لیے کوچنگ پینل کا حصہ بنایا گیا ہے جہاں وہ ٹیسٹ سیریز میں اپنی ذمہ داریاں نبھائیں گے۔
واضح رہے کہ اس سے قبل جب نیوزی لینڈ کی ٹیم پاکستان کے دورے پر آئی تھی تو مہمان ٹیم نے انھیں کوچنگ کے لیے منتخب کیا تھا۔
اس سال نومبر، دسمبر میں نیوزی لینڈ کی ٹیم کا دورہ بنگلا دیش شیڈول ہے جہاں وہ میزبان ٹیم کے خلاف دو ٹیسٹ میچز کھیلے گی۔
