ہیڈ کوچ نیوزی لینڈ کرکٹ ٹیم گیری اسٹیڈ نے کہا کہ پاکستان ہمارا ایک اچھا حریف ہے۔
تفصیلات کے مطابق دورہ پاکستان پر موجود نیوزی لینڈ ٹیم کے ہیڈ کوچ نے کراچی میں پریس کانفرنس کرتے ہوئے کہا کہ پاکستان آکر کافی اچھا محسوس کررہے ہیں، پاکستان ہمارا ایک اچھا حریف ہے فیلڈ میں دونوں ٹیموں کے کھلاڑی اچھے انداز سے ملتے ہیں۔
گیری اسٹیڈ نے کہا کہ کراچی کی کنڈیشن نیوزی لینڈ کے برعکس مختلف ہے، پاکستانی اسپنر کی پرفارمنس کو بھی جائزہ لیتے رہے ہیں، اسکواڈ میں کنڈیشن کو سمجھ کر ہی اسپنر شامل کیے ہیں۔
نیوزی لینڈہیڈ کوچ کا کہنا تھا کہ پاکستان ٹیم کے کچھ اہم کھلاڑی انجری کا شکار ہیں، امید ہے کہ دونوں ٹیموں میں اچھی اور ٹف سیریز ہوگی۔
کین ولیمسن کے حوالے سے گفتگو کرتے ہوئے انہوں نے کہا کہ کین ولیمسن نے قیادت سے ہٹنے کا خود فیصلہ کیا ہے، وہ ابھی اپنی بیٹنگ پر زیادہ توجہ دے رہے ہیں۔
