نومنتخب میئر کراچی مرتضیٰ وہاب نے جلد یوسی ناظم کا الیکشن لڑنے کا اعلان کیا ہے، شہر میں ترقیاتی کاموں کا جال بچھانے کی نوید بھی سنا دی۔
اے آر وائی نیوز کے مطابق کراچی کے نئے میئر مرتضیٰ وہاب نے پریس کانفرنس کرتے ہوئے اگلے 10 روز میں یوسی چیئرمین کا الیکشن لڑنے کا اعلان کیا ہے، انھوں نے کہا کہ سلمان عبداللہ مراد اور میں 10 دن میں اعلان کریں گے کہ کس یو سی سے لڑ رہے ہیں، الیکشن کمیشن سے درخواست کریں گے کہ جلد یونین کمیٹی کے انتخابات کرا دیے جائیں۔
ان کا کہنا تھا کہ پریس کانفرنس کا مقصد پیپلز پارٹی کی جانب سے کراچی کے لیے روڈ میپ فراہم کرنا ہے، پیپلز پارٹی ایسا سسٹم لائے گی کہ جس پر صاف شفاف طریقےسےعمل پیرا ہونگے، کراچی میں کام ہوگا اور ہوتا ہوا نظر آئے گا، شہر میں بےشمار مسائل اور محدود وسائل ہیں، ہم تنقید کا جواب کام سے دیں گے، اسٹیک ہولڈرز کے ساتھ مل کر کام کرنے کی کوشش کریں گے۔
ہمارے شہر میں کوآرڈینیشن کا فقدان ہے، ہم الیکشن لڑنے کے لیے 6 ماہ کا انتظار نہیں کریں گے، ہمارا شہر بے ہنگم بن گیا ہے، اداروں میں کوآرڈینیشن کے فرائض انجام دینا ہماری ذمہ داری ہوگی، جو لوگ دعویٰ کرتےہیں ہم شہر صحیح کریں گے وہ اپنی تشہیر کرتے رہتے ہیں۔
مرتضیٰ وباب نے کہا کہ شہر کی تزئین و آرائش پر کام کرتے ہوئے اس کی خوبصورتی کو بھی برقرار رکھنا ہے، جہاں نئے نالے بنانے کی ضرورت ہے، ان کو تعمیر کیا جائے گا، جو اس شہر سے زیادتی کرے گا اس کے خلاف کھڑے ہوں گے۔
نومنتخب میئر نے کہا کہ شہرکوپانی کی کمی کاسامنا ہے، ماضی میں کسی شخص نے پانی سپلائی بڑھانے کا نہیں سوچا، دنیا بھر میں سمندر کے پانی کو میٹھا کر کے استعمال کیا جاتا ہے، کینجھر جھیل سے پانی لانے کے لیے وفاقی حکومت کےفور پر کام کر رہی ہے۔
کراچی کو یومیہ 100 ملین گیلن پانی ملتا ہے جبکہ حب ڈیم سے جولائن آرہی ہے وہ 1960 کی ہے، فیصلہ کیا ہے پبلک پرائیویٹ پارٹنرشپ کے تحت نئی کینال ڈالی جائے، نالوں کی صفائی بھی ہو رہی ہے 4 ماہ تک یہ عمل جاری رہےگا۔
انھوں نے بتایا کہ آج سے7 روز پہلے وزیراعلیٰ سندھ کی سربراہی میں پبلک پارٹنرشپ کا اجلاس ہوا، ابراہیم حیدری میں 5 ایم جی ڈی کا ری سائیکلنگ پلانٹ لگانے جا رہے ہیں، پراجیکٹ تیار ہے جلد پروسیسنگ فیزمیں چلے جائیں گے، سندھ حکومت کے اشتراک سے واٹر سپلائی سیوریج امپروومنٹ پروگرام تشکیل دیا گیا ہے، ہم سیوریج کے پرانے نظام کو بدلنے جا رہے ہیں۔
