اسلام آباد : قومی اسمبلی ہال میں نواز شریف ، شہباز شریف اور آصف زرداری ، بلاول بھٹو کو حکومتی بنچز کی فرنٹ لائن پر نشستیں الاٹ کردی گئیں۔
تفصیلات کے مطابق نئے مہمانوں کےلئے قومی اسمبلی ہال کی تزئیں و آرائش اور تمام انتظامات مکمل کرلئے گئے ہیں۔
ایوان کے اندر تما م سیاسی جماعتوں کے نو منتخب ممبران کو نشستیں بھی آلاٹ کر دی گئی ہیں، افتتاحی اجلاس میں نومنتخب ارکان کا ریڈ کارپٹ استقبال کیا جائے گا۔
نواز شریف ، شہباز شریف ، آصف زرداری، علیم خان اور راجہ پرویز اشرف کو حکومتی بنچز کی فرنٹ لائن پر نشستیں الاٹ کردی گئی ہیں۔
حکومتی بنچز پر قائد ایوان کے ساتھ پہلی نشست سابق وزیر اعظم نواز شریف کو الاٹ کی گئی ہے جبکہ نواز شریف کے ساتھ خواجہ آصف کو بھی نشست الاٹ کی گئی ہے حکومتی بنچزپر فرنٹ لائن میں آصف ذرداری ، بلاول بھٹو، خالد مقبول صدیقی ،علیم خان ،طارق بشیر چیمہ براجمان ہوں گے۔
اپوزیشن کے عمر ایوب، اسد قیصر ،صاحبزادہ حامد رضا، مولانا فضل الرحمان اور محمود خان اچکزئی اگلی نشستوں پر بیٹھیں گے۔
اجلاس کے آغاز پر تلات کلام پاک و حمد وثناء کے بعد قومی ترانہ پڑھا جائے گا، اسپیکر قومی اسمبلی راجہ پرویز اشرف نومنتخب ارکان اسمبلی سے حلف لیں گے۔
جس کے بعد ارکان اسمبلی یکے بعد دیگرے اسپیکر اسمبلی کی ڈائس پر جاکر رول آف ممبر پر دستخط کریں گے اور اجلاس کے اختتام پر اسپیکر کی جانب سے نئے اسپیکر اور ڈپٹی اسپیکر کے الیکشن کے شیڈول کا اعلان ہوگا، شیڈول کے اعلان ہونے بعد کارروائی کو ملتوی کر دیا جائے گا ۔
