The news is by your side.

Advertisement

پسند کی شادی کرنے والی نمرہ کاظمی کو پیش نہ کرنے پر سندھ ہائی کورٹ برہم

کراچی : سندھ ہائی کورٹ نے پسند کی شادی کرنے والی نمرہ کاظمی کو پیش نہ کرنے پر برہمی کا اظہار کرتے ہوئے پولیس کو نمرہ کاظمی کو 25 مئی کو عدالت میں پیش کرنے کا حکم دے دیا۔

تفصیلات کے مطابق سندھ ہائی کورٹ میں مبینہ طور پر پسند کی شادی کرنے والی نمرہ کاظمی کی بازیابی سے متعلق درخواست کی سماعت ہوئی، حکم کے باوجود کراچی سے مبینہ اغوا ہونے والی لڑکی پیش نہ کرنے پر عدالت نے پولیس پر برہمی کا اظہار کیا۔

جسٹس محمد اقبال کلہوڑو نے تشویش کااظہار کرتے ہوئے کہا کہ یہ کراچی میں کیا ہورہا ہے؟ بچیاں غائب کی جارہی ہیں اور پولیس کچھ نہیں کررہی، 18 سال سے کم عمر بچیاں جارہی ہیں اور پنجاب میں گم ہورہی ہیں۔

عدالت نے کہا کہ ہم نے حکم دیا تھا بچی کو ہر صورت سندھ ہائی کورٹ میں پیش کیا جائے، اب تک نمرہ کاظمی کو بازیاب کراکر عدالت کیوں نہیں لایا گیا؟

ڈی ایس پی سعودآباد نے عدالت کو بتایا کہ پولیس کی بچی کی والدہ کے ساتھ پنجاب میں موجود ہے، نمرہ کاظمی کی ڈیرہ غازی خان کے علاقے تونسہ شریف میں موجودگی کی اطلاع ہے،محکمہ داخلہ پنجاب سے اجازت بعد مطلوبہ مقام پر چھاپہ مارا جائے گا۔

عدالت نے کہا کہ ہم حکم نامہ جاری کرتے ہیں اور جا کر بتائیں محکمہ داخلہ پنجاب کو عدالت نے حکم دیا ہے۔

ڈی ایس پی سعودآباد نے کہا کہ محکمہ داخلہ پنجاب سے آج چھاپہ مارنے کی اجازت ملنے کا امکان ہے، جس کے بعد عدالت نے نمرہ کاظمی کو 25 مئی کو عدالت میں پیش کرنے کا حکم دیتے ہوئے کہا نمرہ کاظمی کو ہر صورت سندھ ہائیکورٹ میں پیش کیا جائے۔

والد نمرہ کاظمی نے عدالت میں کہا کہ نہ بیٹی سے ملنے دیا جا رہا ہے نہ ہی کوئی خبر دی جا رہی ہے، درخواست میں کہا گیا ہے کہ نمرا کی عمر 14سال کچھ مہینے ہے۔

ندیم کاظمی نے بتایا کہ پاکستانی خواتین کو عرب ممالک فروخت کرنے کی اطلاعات ہیں، دعا کو اغوا کرنیوالوں میں بااثر شخصیات ملوث ہیں، وہ لڑکیوں کو عدالت میں پیش نہیں ہونے دیتے اور پولیس کا رویہ ناقابل فہم ہے۔

Comments

یہ بھی پڑھیں