لاہور: تحریک عدم اعتماد پر حکومت یا اپوزیشن کا ساتھ دینے سے متعلق اتحادی جماعتیں آئندہ چند روز میں فیصلہ کریں گی۔
اے آر وائی نیوز کے مطابق تحریک اعتماد پر ساتھ دینے سے متعلق حکومتی اتحادی جماعت ق لیگ 25 مارچ کے بعد فیصلہ کرے گی جبکہ ایم کیو ایم بھی 26 مارچ سے پہلے کسی فیصلے کا اعلان نہیں کرے گی۔
ذرائع کا کہنا ہے کہ چوہدری برادران 24 مارچ کو اسلام آباد پہنچیں گے، ق لیگ کے رہنما مونس الٰہی بھی 23 مارچ کو اسلام آباد پہنچیں گے۔
اس سے قبل ذرائع کا کہنا تھا کہ علاج کے لیے لندن جانے والے نوازشریف نے عدم اعتماد کامیاب ہونے پر وطن واپسی کا فیصلہ کیا ہے۔
مزید پڑھیں: ‘عدم اعتماد کامیاب ہوئی تو نوازشریف واپس آئیں گے’
ذرائع کا بتانا تھا کہ حالات کو دیکھتے ہوئے نوازشریف سعودی عرب سے براہ راست پاکستان آسکتے ہیں یا پھر کچھ روز کے لیے لندن قیام کر کے مئی کے پہلے ہفتے میں پاکستان واپس آئیں گے۔
نوازشریف کے ذاتی معالج ڈاکٹر عدنان بھی لندن پہنچ چکے ہیں جہاں وہ دیگر معالجین سے مشاورت کریں گے، سابق وزیراعظم نے اپنے فیصلے سے اہلِ خانہ کے قریبی افراد اور اپوزیشن لیڈر شہبازشریف کو بھی آگاہ کر دیا ہے۔
سابق گورنر سندھ محمد زبیر کا کہنا تھا کہ عدم اعتماد کی تحریک کامیاب ہونے کے بعد نوازشریف وطن آئیں گے اور اپنے خلاف عدالتی فیصلوں کا سامنا کریں گے۔
