The news is by your side.

Advertisement

وزیراعظم کے خلاف تحریک عدم اعتماد: پی ڈی ایم کا اہم سربراہی اجلاس کل طلب

اسلام آباد : پی ڈی ایم کا اہم سربراہی اجلاس کل طلب کرلیا گیا ، جس میں وزیراعظم عمران خان کےخلاف عدم اعتماد کی تحریک سے متعلق حکمت عملی طے کی جائے گی۔

تفصیلات کے مطابق وزیراعظم عمران خان کے خلاف عدم اعتماد کی تحریک کے معاملے پر پی ڈی ایم کا اہم سربراہی اجلاس کل طلب کرلیا گیا۔

ذرائع کا کہنا ہے کہ اجلاس پی ڈی ایم کےسربراہ مولانافضل الرحمان کی زیرصدارت ہوگا اور نوازشریف اجلاس میں وڈیولنک سے اور
پی ڈی ایم میں شامل جماعتوں کے سربراہان بھی شریک ہوں گے۔

اجلاس میں پی ڈی ایم عدم اعتماد سے متعلق حکمت عملی طے کرے گی اور مولانافضل الرحمان حکومتی اتحادیوں،اپوزیشن سے ملاقاتوں پر اعتماد میں لیں گے۔

ذرائع کے مطابق اجلاس میں پی ڈی ایم حکومت مخالف حتمی حکمت عملی بھی طے کی جائے گی۔

گذشتہ روز مولانا فضل الرحمان نے اسلام آباد میں شہباز شریف سے ملاقات کے بعد پریس کانفرنس میں کہا تھا عمران خان میں وارننگ دے رہا ہوں اپنی زبان ٹھیک کر لو، سن لو ہم تمھیں جام کرنا جانتے ہیں۔

مولانا نے وزیر اعظم کو مخاطب کر کے کہا تھا کہ ہم نے شرافت کا راستہ اپنایا مگر تمہاری فطرت میں یہ چیز نہیں، آپ کی زبان بتا رہی ہے کہ وزیر اعظم بننے کے اہل نہیں ہیں، لگام لگایا جائے، اس کے گلے میں پٹا ڈالا جائے، کیوں کہ پاکستان اس کا متحمل نہیں ہو سکتا۔

فضل الرحمان کا یہ بھی کہنا تھا کہ عدم اعتماد کی تحریک کامیاب نہیں ہوئی تو معاملات گلی کوچوں میں لے کر جائیں گے، پھر ہم سے کہا جائے گا کہ آپ ایسا نہ کریں کہ کہیں نظام نہ لپیٹ لیا جائے۔

Comments

یہ بھی پڑھیں