اسلام آباد: الیکشن کمیشن کے اجلاس میں سنی اتحاد کونسل کو مخصوص نشستوں کا کوٹہ دینے کا فیصلہ نہ ہو سکا اور اجلاس بغیر کسی نتیجے ختم کر دیا گیا۔
ذرائع نے اے آر وائی نیوز کو بتایا کہ سنی اتحاد کونسل کو مخصوص نشستوں کے معاملے پر الیکشن کمیشن کا اجلاس اب پیر کو ہوگا، کمیشن سیاسی جماعت کو مخصوص نشستیں دینے یا نہ دینے کا حتمی فیصلہ کرے گا۔
ذرائع نے بتایا کہ کل ہونے والے اجلاس میں الیکشن کمیشن کا لا ونگ نشستوں کے معاملے پر قانونی رائے بھی دے گا، چیف الیکشن کمشنر سکندر سلطان راجہ کی زیرِ صدارت اجلاس میں سیاسی جماعت کی درخواست کا جائزہ لیا جائے گا۔
پی ٹی آئی کے امیدواروں نے بلّے کا انتخابی نشان چھن جانے کے باعث آزاد حیثیت میں الیکشن لڑا اور بڑی تعداد میں کامیاب ہوئے۔ اب مخصوص نشستوں کیلیے وہ سنی اتحاد کونسل میں شامل ہوئے ہیں۔
گزشتہ روز سنی اتحاد کونسل نے خواتین اور اقلیتوں کی مخصوص نشستوں کیلیے الیکشن کمیشن میں تحریری درخواست جمع کروائی تھی۔ تحریری درخواست کے ساتھ پارٹی لیٹر اور بیان حلفی بھی جمع کروایا گیا تھا جبکہ استدعا کی گئی تھی کہ خواتین اور اقلیت کی مخصوص نشستوں پر کوٹہ الاٹ کیا جائے۔
درخواست میں کہا گیا تھا کہ پنجاب اسمبلی کے 107 آزاد اراکین نے بھی سنی اتحاد کونسل میں شمولیت اختیار کر لی ہے، اس لیے تمام کامیاب آزاد امیدواروں کے تناسب سے مخصوص نشستیں لاٹ کی جائیں۔
ذرائع کا کہنا تھا کہ سنی اتحاد کونسل کی جانب سے آج الیکشن کمیشن میں مخصوص نشستوں پر فہرست الیکشن کمیشن میں جمع کرائی جائے گی۔
