The news is by your side.

Advertisement

افغانستان میں کوئی گروہ فیورٹ نہیں: وزیر خارجہ

اسلام آباد: وزیر خارجہ شاہ محمود قریشی نے کہا ہے کہ افغانستان میں کوئی گروہ فیورٹ نہیں ہے، ہم سب سے یکساں سلوک کے حامی ہیں، اور متحد افغانستان کی خواہش رکھتے ہیں۔

ان خیالات کا اظہار وزیر خارجہ پاکستان نے افغان اولسی جرگے کے وفد سے ملاقات کے دوران کیا، افغان پارلیمانی وفد کی قیادت اسپیکر رحمان رحمانی کر رہے تھے۔

ملاقات میں دو طرفہ تعلقات، باہمی تجارت اور خطے کی معاشی صورت حال پر تبادلہ خیال کیا گیا، شاہ محمود نے کہا پاکستان افغانستان سے تاریخی دوستانہ تعلقات کو اہمیت دیتا ہے، حکومت وزیر اعظم کی قیادت میں افغان عوام کے لیے مثبت سوچ رکھتی ہے۔

ان کا کہنا تھا کہ وزیر خارجہ کا منصب سنبھالنے کے بعد انھوں نے پہلا دورہ ہی افغانستان کا کیا تھا، شاہ محمود نے وفد سے کہا میری طرف سے 10 نکاتی واضح پیغام افغان پارلیمنٹ کو دیں، افغانستان میں ہمارا کوئی گروہ فیورٹ نہیں سب سے یکساں سلوک کے حامی ہیں، ہم متحد افغانستان کی خود مختاری اور علاقائی سالمیت کا احترام اور خواہش رکھتے ہیں۔

وزیر خارجہ نے کہا پر امن، مستحکم اور خوش حال افغانستان، پاکستان کے مفاد میں ہے، ہمیں دو طرفہ تجارت اور معیشت کے مواقع سے استفادہ کرنا چاہیے، وزیر اعظم اور حکومت نے ہمیشہ یہی کہا افغان مسئلے کا کوئی فوجی حل ممکن نہیں، اس لیے افغان امن عمل میں مصالحانہ کردار ادا کیا۔

شاہ محمود کا کہنا تھا کہ امریکا اور طالبان میں امن معاہدے کے موقع سے بھرپور استفادہ کرنا چاہیے، افغان مذاکرات طویل اور پیچیدہ ہو سکتے ہیں، اس لیے فریقین صبر کا دامن ہاتھ سے نہ چھوڑیں، بین الافغان مذاکرات کا نتیجہ خیز ہونا نہایت ضروری ہے۔

انھوں نے مزید کہا کہ پاکستان افغان عوام کی رائے کا صدق دل سے احترام کرتا ہے، پاکستان افغان مذاکرات میں افغان قیادت کے فیصلوں کا بھی احترام کرے گا، پاکستان سے زیادہ کوئی ملک افغانستان میں مستقل قیام امن کا خواہاں نہیں ہو سکتا۔

اس موقع پر افغان اسپیکر میر رحمنٰ رحمانی کا کہنا تھا کہ دوطرفہ تعلقات کو مستحکم بنانے اور باہمی تجارت میں اضافے خصوصاً افغان ٹرانزٹ ٹریڈ میں حائل رکاوٹوں کو دور کرنے کے لیے پاکستان کی کاوشیں قابل تحسین ہیں۔

انھوں نے کہا افغانستان پاکستان کے ساتھ اپنے برادرانہ تعلقات کو قدر کی نگاہ سے دیکھتا ہے اور انھیں مزید مستحکم بنانے کا خواہاں ہے، خطے میں امن کے قیام کے لیے پاکستان کا کردار قابل ستائش ہے۔

Comments

یہ بھی پڑھیں