کراچی : پی آئی اے انتظامیہ نے فیصلہ کیا ہے کہ تمام جہازوں پر موسیقی نہیں اب قصیدہ بردہ شریف پڑھا جائے گا، تجرباتی طور پر بوئنگ777 طیاروں پرقصیدہ بردہ شریف سنایا جارہا ہے۔
تفصیلات کے مطابق پی آئی اے انتظامیہ نے تمام جہازوں پر موسیقی کے بجائے قصیدہ بردہ شریف سنانے کا فیصلہ کیا ہے، یہ فیصلہ پی آئی اے کے سی ای او ایئرمارشل ارشد ملک کی ہدایت پرعملدرآمد کرتے ہوئے کیا گیا ہے۔
انتظامیہ کا کہنا ہے کہ اندرون و بیرون ملک جانیوالی تمام پروازوں پر موسیقی کے بجائے قصیدہ بردہ شریف پڑھا جائے گا، تجرباتی طور پر پی آئی اے کے بوئنگ777طیاروں میں قصیدہ بردہ شریف سنایا جارہا ہے۔
یاد رہے کہ اس سے قبل پی آئی اے کی تمام پروازوں میں مدہم موسیقی بجا کرتی تھی جبکہ پروازوں میں روانگی سے قبل سفر کی دعا پڑھی جاتی ہے۔
گذشتہ روز قومی ایئرلائن کےسی ای اوارشد ملک نے پریس کانفرنس میں بتایا کہ پی آئی اےمیں کرپشن مافیا سرگرم تھا، انجن تو کبھی جہازوں کا دیگر سامان چوری ہوا، گھوسٹ ملازمین اور جعلی ڈگریوں والے بھرے پڑے تھے جبکہ پائلٹس کے لائسنس تک جعلی تھے۔
ان کا کہنا تھا کہ مسافروں کے ساتھ بہت غلط رویے کی شکایات کا تسلسل تھا، جہازوں سے انجن اتار لیے جاتے تھے، پارٹس غائب ہوجاتے تھے۔ جہاز کو کھڑا کر کے پہیے تک اتار دیے جاتے تھے، نااہلی کا یہ عالم تھا کہ اہم سامان ڈبوں میں پڑے پڑے ایکسپائر ہوگیا تھا، ادارے کو سالانہ کروڑوں روپے کا نقصان ہو رہا ہے۔ انتظامیہ آنکھیں بند رکھتی تھی کچھ روٹس پر 300 ملین کا نقصان ہوا، 500 ملین ہمیں کچھ فلائٹوں سے نقصان ہو رہا تھا لہذا انہیں بند کردیا گیا ہے۔
خیال رہے کہ پاکستان ایئرلائن انتظامیہ کی جانب سے کارکردگی کو بہتر بنانے کیلئے مختلف اقدامات کئے جارہے ہیں ، اس سے قبل جہاز کے عملے کو قد اورعمر کے لحاظ سے وزن کم کرکے عالمی معیار کے مطابق کرنے کی ہدایت کرتے ہوئے کیبن کریو کو 6 ماہ کی مہلت دی گئی تھی۔
