لاہور: وزیر قانون پنجاب راجہ بشارت کا کہنا ہے کہ کسی کو قانون ہاتھ میں لینے کی اجازت نہیں دی جاسکتی، وکلاء ،ڈاکٹرزدونوں کو ذمہ دارانہ رویے کا مظاہرہ کرنا چاہیے تھا۔
تفصیلات کے مطابق صوبائی دارالحکومت لاہور میں وزیر قانون پنجاب راجہ بشارت کی زیرصدارت پنجاب کابینہ کمیٹی برائے امن وامان کا اجلاس ہوا۔ اجلاس میں قانون نافذ کرنے والے اداروں نے پی آئی سی واقعے کا ذمہ دار وکلاء کو ٹھہرا دیا۔
اجلاس میں بریفنگ کے دوران بتایا گیا کہ سیکڑوں وکلاء نے پی آئی سی پر دھاوا بولا، سرکاری املاک کو نقصان پہنچایا، ڈاکٹرز، مریضوں اور ان کے اہل خانہ کو زدوکوب کیا گیا۔
وزیر قانون پنجاب نے کہا کہ کابینہ کمیٹی کی رپورٹ کچھ دیر میں وزیراعلیٰ پنجاب کو پیش کر دی جائی گی۔ انہوں نے کہا کہ کسی کو قانون ہاتھ میں لینے کی اجازت نہیں دی جاسکتی، وکلاء ،ڈاکٹرزدونوں کو ذمہ دارانہ رویے کا مظاہرہ کرنا چاہیے تھا۔
وکلا نے پنجاب انسٹی ٹیوٹ آف کارڈیالوجی پر دھاوا بول دیا
واضح رہے کہ وکلاء کی جانب سے آج پنجاب انسٹیٹیوٹ آف کارڈیالوجی کے اندر گھس کر توڑ پھوڑ کی گئی اور ڈاکٹروں کو تشدد کا نشانہ بنایا گیا۔
واقعے کی اطلاع ملنے کے بعد وزیر اطلاعات پنجاب فیاض الحسن چوہان رپورٹ لینے کے لیے موقع پر پہنچے تو مشتعل وکلاء نے انہیں تشدد کا نشانہ بنا ڈالا۔ فیاض الحسن چوہان کا کہنا تھا کہ انہیں اغوا کرنے کی کوشش کی گئی، آج انصاف پسند وکلاء بہت رنجیدہ اور دکھی ہوں گے۔
