اسلام آباد: وزیر مملکت پیٹرولیم مصدق ملک کا کہنا ہے کہ حکومت کی جانب سے پیٹرولیم مصنوعات کی قیمتیں بڑھانے کا ابھی کوئی پلان نہیں، قیمتیں اپنے طریقہ کار سے بڑھیں گی۔
نیوز کانفرنس کرتے ہوئے وزیر مملکت مصدق ملک نے کہا کہ افواہیں ہیں کہ ملک میں تیل کی قلت ہوگئی جبکہ اس وقت میں 20 دن کا پیٹرول اور 29 دن کا ڈیزل ملک میں موجود ہے، ذخیرہ اندوز عوام کا حق مار رہے ہیں۔
مصدق ملک نے کہا کہ ذخیرہ اندوزوں کو وارننگ دے رہا ہوں کہ باز آ جائیں ورنہ سخت فیصلے کرنے جا رہے ہیں، ذخیرہ اندوز پھر یہ نہ کہیں کہ حکومت نے بتایا نہیں تھا، ایک بار پمپ بند کر دیے تو پھر کھول نہیں سکیں گے۔
وزیر پیٹرولیم کا کہنا تھا کہ خبردار کرتا ہوں کہ اگر عوام کو تنگ کریں گے تو ہم بھی آپ کو تنگ کریں گے، پمپ مالکان کو بھی کہتا ہوں ذخیرہ اندوزی بند کریں ورنہ لائسنز منسوخ کر دیں گے۔
