فن لینڈ: موبائل فون کی معروف کمپنی نوکیا نے دوبارہ مارکیٹ میں قدم جمانے کے لیے اینڈرائیڈ فون کے بعد اب صارفین کے لیے ٹیبلٹ پیش کرنے کی بھرپور تیاری کرلی جو اپنی جسامت میں ’’ایپل آئی پیڈ پرو‘‘ کے ہم پلہ ہوگا۔
تفصیلات کے مطابق نوکیا نے اپنی گرتی ہوئی ساکھ کو برقرار رکھنے کے لیے گزشتہ دنوں پہلا اینڈرائیڈ فون مارکیٹ میں پیش کیا جس نے فروخت کے معاملے میں ایک نیا ریکارڈ قائم کیا۔ موبائل ٹیکنالوجی پر نظر رکھنے والے ادارے جی ایف ایکس بینچ کی جانب سے اعلان کیا گیا ہے کہ نوکیا نے اپنے نئے آنے والے ٹیبلٹ کو حتمی شکل دے دی ہے۔
ادارے کے مطابق نوکیا کا نیا آئی پیڈ جسامت اور کارکردگی کے حساب سے آئی پیڈ پرو جیسا ہوگا کیونکہ کمپنی کی جانب سے اُس میں 4 جی بی ریم، 64 میگا بائٹ اسٹوریج 12 میگا پکسل فرنٹ و بیک کیمرے کے علاوہ سم کا اضافی آپشن بھی رکھا گیا ہے۔
نوکیا کے آئی پیڈ کی چوڑائی 18.4 انچ کے قریب ہوگی جبکہ صارفین کی شکایات کو دور کرنے اور انٹرنیٹ کی مسلسل فراہمی کو یقینی بنانے کے لیے کمپنی نے اس میں سم کا اضافی فیچر بھی شامل کیا ہے۔
ادارے کے مطابق نوکیا کا گزشتہ آئی پیڈ سی ون کے نام سے 2015 میں پیش کیا گیا تھا تاہم اب آنے والے ٹیبلیٹ میں جدید ٹیکنالوجی کو مدنظر رکھتے ہوئے صارفین کو زیادہ سے زیادہ سہولیات پیش کی جارہی ہیں۔ نوکیا کے نئے آئی پیڈ کو آئندہ ماہ موبائل ورلڈ کانفرنس میں عوامی نمائش کے لیے رکھا جائے گا۔
