کراچی: پیپلز پارٹی کے نامزد وزیرِ اعلیٰ سندھ مراد علی شاہ نے کہا ہے کہ اس وقت ملک کو کافی مشکلات کا سامنا ہے۔
تفصیلات کے مطابق پیپلز پارٹی کے نامزد وزیرِ اعلیٰ سندھ مراد علی شاہ نے کہا ہے کہ آج ارکان حلف اٹھائیں گے، کل اسپیکر کا الیکشن ہوگا اور پرسوں چیف منسٹر کا الیکشن ہوگا۔
انہوں نے کہا کہ احتجاج کرنا لوگوں کا حق ہے، امید کرتا ہوں قانون ہاتھ میں نہیں لیں گے، وہ احتجاج کرتے رہیں ہم اندر حلف اٹھائیں گے، میں نے پہلے ہی بتادیا تھا 90 سے 95 سیٹیں لیں گے۔
سابق وزیراعلیٰ مرادعلی شاہ نے کہا کہ اس وقت ملک کو کافی مشکلات کا سامنا ہے، اللہ کی رضاسے خیریت سے یہ مراحل گزر جائیں۔
مراد علی شاہ نے کہا کہ وفاق اور صوبائی حکومتوں کیلئے بہت بڑا چیلنج ہے، سب کو ساتھ ملک کر مشکلات کو حل کرنا ہوگا۔
واضح رہے کہ سندھ اسمبلی کا اجلاس کچھ دیر بعد شروع ہو گا، جس میں نومنتخب اراکین حلف اٹھائیں گے، اسپیکر سندھ اسمبلی آغا سراج درانی اجلاس کی صدارت کریں گے۔
سندھ اسمبلی کے ایوان میں ممبران کی کل تعداد 168 ہے جبکہ 163 حلف اٹھائیں گے، 128 منتخب اور 35 مخصوص نشستوں کے ممبران حلف اٹھائیں گے۔
