پیانگ یانگ: شمالی کوریا میں نئی قسم کے ٹیکٹیکل گائیڈڈ ہتھیار کو تجرباتی طور پر فائر کیا گیا، ہتھیاروں کا یہ نظام ملک کی ٹیکٹیکل جوہری کارروائیوں کے مؤثر پن کو تقویت دے گا۔
بین الاقوامی میڈیا کے مطابق شمالی کوریا میں نئی قسم کے ٹیکٹیکل گائیڈڈ ہتھیار کو تجرباتی طور پر فائر کیا گیا، ملک کی حکمران ورکرز پارٹی کے اخبار رودونگ سنمن نے اپنے اتوار کے شمارے میں خبر دی کہ یہ ہتھیار شمالی کوریا کے رہنما کم جونگ ان کی موجودگی میں داغا گیا۔
رپورٹ میں کہا گیا ہے کہ یہ ہتھیار کم فاصلے تک مار کرنے والا بیلسٹک میزائل تھا جسے غالباً ہفتے کے روز داغا گیا تھا۔
اخبار نے مذکورہ پروجیکٹائل کو ایک لانچر سے داغے جانے اور ہدف بنائے گئے جزیرے پر نشانہ لگنے کی تصاویر شائع کی ہیں۔
رپورٹ میں بتایا گیا کہ ہتھیاروں کا یہ نظام ملک کی ٹیکٹیکل جوہری کارروائیوں کے مؤثر پن کو تقویت دینے اور اس کی فائر پاور کو متنوع بنانے میں مدد دے گا۔
اس میں یہ بھی کہا گیا ہے کہ کم جونگ نے ملک کی دفاعی صلاحیت اور جوہری جنگی فورسز کو مزید تقویت دینے سے متعلق ہدایات دی ہیں۔
