پیانگ یانگ: شمالی کوریا کے رہنما نے کہا ہے کہ ان کی جانب سے دھمکیوں کا جواب جوہری ہتھیاروں سے دیا جائے گا۔
غیر ملکی میڈیا کے مطابق شمالی کوریا کے رہنما کم جونگ اُن نے کہا ہے کہ ملک کو دی جانے والی دھمکیوں کا جواب جوہری ہتھیاروں سے دیں گے۔
ان کا کہنا تھا کہ کسی بھی ایٹمی کارروائی کا جواب ایٹمی ہتھیاروں سے دیا جائے گا، دوسری طرف جنوبی کوریا کی حکومت کا کہنا ہے کہ شمالی کوریا نے مشرق کی جانب بین البراعظمی بیلسٹک میزائل فائر کیا ہے۔
جاپانی حکام نے روئٹرز کو بتایا کہ شمالی کوریا نے جمعہ کو ایک مشتبہ بین البراعظمی بیلسٹک میزائل داغا ہے جو جاپان سے صرف 200 کلومیٹر دور گرا، اور یہ میزائل امریکا کی سرزمین تک پہنچنے کی صلاحیت بھی رکھتا ہے۔
شمالی کوریا کا مبینہ ‘بیلسٹک میزائل’ جاپان کے قریب گرگیا
جمعرات کو شمالی کوریا نے ایک مختصر فاصلے تک مار کرنے والا بیلسٹک میزائل بھی فائر کیا تھا، شمالی کوریا کے وزیر خارجہ چوئے سون ہوئی نے اس موقع پر علاقے میں امریکا کی بڑھتی ہوئی فوجی موجودگی پر خبردار کرتے ہوئے کہا کہ ان کی جانب سے اس پر ’سخت فوجی رد عمل‘ دیا جائے گا۔
انھوں نے اپنے بیان میں کہا کہ واشنگٹن ایک ’جوا کھیل رہا ہے جس کا اسے پچھتاوا ہو گا۔‘
