اسلام آباد: مسلم لیگ (ن) کی رکن قومی اسمبلی نوشین افتخار سنی اتحاد کونسل کے رہنما اسد قیصر کیلیے پارلیمنٹ میں چوڑیاں خرید لائیں۔
اسد قیصر نے گزشتہ روز قپنی تقریر میں چوڑیوں کو عورت کی کمزوری سے تشبیہ دی تھی۔ نوشین افتخار کا کہنا ہے کہ اپنے لیے چوڑیاں خریدنے گئی تو ساتھ اسد قیصر کیلیے بھی خرید لائی۔
(ن) لیگی رہنما نے کہا کہ ڈسکہ الیکشن میں بکسے چوری کرنے کا اعزاز پی ٹی آئی کو جاتا ہے۔
گزشتہ روز قومی اسمبلی کے اجلاس میں ثنا اللہ مستی خیل کی جانب سے نازیبا الفاظ کا استعمال کیا گیا تھا جس پر ڈپٹی اسپیکر سید غلام مصطفیٰ شاہ ان کا مائیک بند کر دیا تھا۔
بعدازاں پی ٹی آئی رکن کے ریمارکس پر ایوان میں شور شرابہ کیا گیا تھا۔ حکومتی خواتین ارکان اسپیکر کے چیمبر میں جا پہنچیں اور پی ٹی آئی رکن کی معطلی کا مطالبہ کرتے ہوئے نعرے بازی کی تھی۔
ذرائع نے اے آر وائی نیوز کو بتایا تھا کہ حکومتی ارکان کے احتجاج پر ثنا اللہ مستی خیل کی رکنیت معطلی کا فیصلہ کیا گیا۔
اسپیکر قومی اسمبلی ایاز صادق نے اپنے بیان میں کہا تھا کہ ثنا اللہ مستی خیل نے اسمبلی رولز کی سنگین خلاف ورزی کی ہے، ان کی بجٹ کے مکمل سیشن میں رکنیت معطل کی جاتی ہے۔
ایوان نے پی ٹی آئی رکن کی رواں اجلاس کیلیے معطلی کی تحریک منظور کر لی۔ اسپیکر نے کہا تھا کہ 2002 سے ایوان کا حصہ ہوں آج تک مائیک پر ایسے الفاظ استعمال نہیں ہوئے۔
