کراچی: چند روز قبل فواد خان کی کچھ تصاویر منظر عام پر آئی تھیں جن میں وہ کافی بدلے بدلے دکھائی دے رہے تھے۔ ذرائع کے مطابق ان کا یہ نیا روپ ان کی نئی آنے والی فلم کے لیے تھا جو ممکنہ طور پر پاکستانی کلاسیکی فلم ’مولا جٹ‘ کا سیکوئل ہے۔
لیکن اس فلم کے بارے میں اس کے ہدایت کار بلال لاشاری نے تمام غلط فہمیوں کو دور کردیا۔
اپنے سماجی رابطوں کی ویب سائٹ فیس بک پر ایک پوسٹ میں ان کا کہنا تھا کہ یہ فلم نہ ہی تو مولا جٹ کا سیکوئل ہے اور نہ ہی اس کا ری میک۔
انہوں نے کہا کہ بہت جلد اس فلم کے نام کا اعلان کردیا جائے گا۔
یاد رہے کہ مذکورہ فلم کی شوٹنگ جاری ہے اور ذرائع کے مطابق کرداروں کو مار دھاڑ اور ایکشن سے بھرپور مناظر کی تربیت دینے کے لیے لاس اینجلس سے ایک کوریو گرافر کو بلوایا گیا ہے۔
فلم میں اداکار فواد خان اور حمزہ علی عباسی اہم کردار ادا کر رہے ہیں۔
یاد رہے کہ سنہ 2013 میں بلال لاشاری کی فلم ’وار‘ نے پاکستانی سینما کی بحالی میں اہم کردار ادا کیا تھا اور اس فلم نے دنیا بھر میں مقبولیت حاصل کی تھی۔
