قاہرہ : مصر میں ان دنوں سوشل میڈیا پر ایک نوٹ کی تصویر گردش کر رہی جس کے بارے میں دعویٰ کیا گیا کہ وہ نئی 50 پاؤنڈ کرنسی کی ہے جو جلد ہی متعارف کرائی جائے گی۔
اس تصویر کے پوسٹ ہوتے ہی سوشل میڈیا صارفین نے اپنے ردعمل کا اظہار کیا، جس میں اس کی مخالفت میں زیادہ کمنٹس کیے گئے۔
مذکورہ تصویر میں ایک ہاتھ میں ایک بینک نوٹ پکڑا ہوا ہے جس پر فرعون کے مجسمے کی تصویر بنی ہوئی ہے۔
سوشل میڈیا پلیٹ فارمز پر سرگرم افراد نے اس کی تصدیق کی کہ یہ ایک نیا نوٹ ہے جسے مصر میں جلد متعارف کرایا جائے گا، اس دوران ڈیزائن کی حمایت اور رد کرنے والوں کے تبصرے بھی سامنے آئے۔
معاملہ جب بہت زیادہ بڑھ گیا تو مصر کے سنٹرل بینک نے اپنی خاموشی توڑدی، ذرائع نے مقامی میڈیا کو اس بات کی تردید جاری کی اور کہا کہ ایسا کوئی کاغذی نوٹ جاری نہیں کیا گیا ہے۔
ذرائع کا کہنا تھا کہ مرکزی بینک نے ایک سال قبل 10 پاؤنڈز اور چند ماہ قبل 20 پاؤنڈز کی پیشکش کے بعد ابھی تک کسی نئی کرنسی کی پیشکش کا اعلان نہیں کیا ہے۔
مزید تحقیق سے واضح ہوا کہ تصویر میں موجود بینک نوٹ برسوں پہلے شائع ہونے والے فنکارانہ ڈیزائن کے سوا کچھ نہیں تھا۔
بعد ازاں تصویر کی تلاش کے بعد معلوم ہوا کہ یہ ڈیزائن اس سے پہلے بھی شائع ہوچکا تھا، یہ تصویر 2018 میں انفارمیشن آڈیٹنگ پلیٹ فارم "ڈی جاڈ” پر شائع ہونے والی رپورٹ کی ہے۔ اس کا ماخذ 13 دسمبر 2016 کی ایک پوسٹ تھی جو اس فیس بک پیج پر شائع ہوئی۔
اس سے یہ بات واضح ہوگئی ہے کہ یہ ڈیزائن صرف ایک افواہ ہے اور اس نوٹ کا حقیقت سے کوئی تعلق نہیں ہے۔
