محکمہ تعلیم سندھ نے صوبے بھر کے سرکاری و نجی تعلیمی اداروں میں چھٹی سے آٹھویں کلاسز میں کل 15 جون سے تدریسی عمل شروع کرنے کا نوٹیفکیشن جاری کر دیا۔
وزیرتعلیم سندھ سعید غنی نے محکمہ تعلیم کا کلاسز بحالی کا نوٹیفکیشن اپنے ٹوئٹر اکاؤنٹ پر شیئر کیا ہے۔ نوٹیفکیشن کے ساتھ وزیرتعلیم نے لکھا کہ 15 جون سے چھٹی تا آٹھویں جماعتوں کا تدریس عمل شروع ہو رہا ہے۔
Notification issued for reopening of classes from 6th to 8th from 15th June 2021. pic.twitter.com/YkmDEwxcDM
— Senator Saeed Ghani (@SaeedGhani1) June 14, 2021
اس سے قبل وزیر تعلیم سندھ سعید غنی نے کہا کہ سندھ بھر میں چھٹی سے آٹھویں تک کی کلاسز میں تدریسی عمل منگل 15 جون سے شروع کردیا جائے گا۔
صوبائی وزیر تعلیم کا کہنا تھا کہ صوبے میں کرونا وائرس کی صورتحال بہتر رہی تو پرائمری تا پانچویں تک کی کلاسز میں تدریسی عمل 21 جون سے شروع کردیا جائے گا۔
انہوں نے کہا کہ سندھ کرونا ٹاسک فورس کے اجلاس میں اس کی منظوری دے دی گئی ہے، اس وقت گو کہ کراچی اور حیدر آباد میں کرونا متاثرین کی تعداد 5 فیصد سے زائد ہے تاہم جس تیزی سے ویکسی نیشن کا عمل جاری ہے اس سے صورتحال میں بہتری آرہی ہے۔
سعید غنی کا کہنا تھا کہ ہم نے گزشتہ ہفتے کلاس نویں تا انٹر تک تدریسی عمل شروع کردیا ہے اور انشا اللہ منگل 15 جون سے کلاس چھٹی تا آٹھویں تک تدریسی عمل کا آغاز کردیا جائے گا جبکہ ایک ہفتے تک صورتحال کا مزید جائزہ لے کر 21 جون سے تمام چھوٹی کلاسز میں بھی تدریسی عمل کا آغاز کیا جائے گا۔
انہوں نے کہا کہ اس دوران تمام کلاسز میں ایس او پیز کے تحت حاضری کا تناسب 50 فیصد ہوگا جبکہ اسکولز کے تمام عملے کو ویکسی نیشن کروانا لازمی ہوگی۔
