اسلام آباد : قومی سلامتی کمیٹی نے آئندہ 10 سال کے معاشی روڈ میپ کی تیاری کا فیصلہ کرلیا اور کہا گیا کہ معیشت کو سیاست سے بالاتر اور معاشی فیصلوں کا تسلسل برقرار رکھا جائے گا۔
تفصیلات کے مطابق قومی سلامتی کے اجلاس میں قومی خود مختاری سے متعلق اہم معاشی فیصلے کر لئے گئے۔
ذرائع نے بتایا کہ اجلاس میں آئندہ 10 سال کے معاشی روڈ میپ کی تیاری کا فیصلہ کیا گیا ، معیشت کو سیاست سے بالا رکھا جائے گا اور معاشی فیصلوں کا تسلسل برقرار رکھا جائے گا۔
ذرائع کا کہنا تھا کہ ٹیکس آمدن بڑھانے کے لیے مزید اقدامات کیے جائیں گے اور ٹیکس چوروں کے خلاف متفقہ کارروائیوں کی جائیں گی۔
ذرائع کے مطابق بجلی و گیس کے نقصانات کم کرنے کیلئے مؤثر حکمت عملی تیار کی جائے گی ساتھ ہی بجلی اور گیس کا سرکلر ڈیٹ کم کرنے کے لیے مزید سخت فیصلے کیے جائیں گے۔
آئندہ 6 ماہ میں بجلی اور گیس کے ریٹ مرحلہ وار بڑھائے جائیں گے جبکہ پٹرول اور گیس پر لیوی میں 30 سے 50 روپے تک مزید اضافہ تجویز دی گئی ہے۔
ذرائع نے بتایا کہ لیوی بڑھانے کے لیے پارلیمنٹ میں ضروری قانون سازی کی جائے گی اور پٹرولیم لیوی سے آئندہ 6 ماہ میں نان ٹیکس ریونیو میں اضافہ کیا جائے گا۔
