حج کا رکن اعظم وقوف عرفات کل ادا ہو گیا دنیا بھر سے آئے 16 لاکھ 73 ہزار سے زائد عازمین نے حج کی سعادت حاصل کی۔
حج کا رکن اعظم وقوف عرفات کل ادا ہو گیا۔ حجاج کرام نے آج قربانی کر کے احرام کھول دیے۔ لبیک اَلَّھُم لبیک (حاضر ہوں میں اللہ حاضر ہوں) کی صدائیں بلند کرتے ہوئے دنیا بھر سے آئے 16 لاکھ 73 ہزار 230 عازمین نے حج کی سعادت حاصل کر لی۔
سعودی ادارہ شماریات کے مطابق ان میں سے 15 لاکھ 6 ہزار 576 حجاج کرام 171 مختلف ممالک سے آئے، جب کہ سعودی عرب کے اندر سے ایک لاکھ 66 ہزار 654 افراد نے حج ادا کیا۔
حجاج کرام میں 8 لاکھ 77 ہزار 841 مرد اور 7 لاکھ 95 ہزار 389 خواتین شامل تھیں، جسے تاریخ کا ایک متوازن تناسب قرار دیا جا رہا ہے۔
رکنِ اعظم وقوف عرفہ کی ادائیگی جمعرات کے روز مکمل ہوئی، جس کے بعد حجاج کرام مزدلفہ روانہ ہوئے، جہاں مغرب اور عشاء کی نمازیں قصر و جمع کر کے ادا کی گئیں۔
حجاج کرام مزدلفہ میں رات کھلے آسمان تلے گزارنے کے بعد صبح سویرے رمی کے لیے جمرات پہنچے اور بڑے شیطان کو کنکریاں ماریں۔ بعد ازاں جانور کی قربانی کرکے احرام کھول دیے۔ سعودی حکومت کی جانب سے حجاج کرام کی سہولت کے لیے خصوصی قربان گاہیں قائم کی گئی تھیں
حجاج کرام 11 ذی الحج (ہفتہ) اور 12 ذی الحج (اتوار) کو بھی تینوں شیطانوں کو کنکریاں ماریں گے اور منیٰ میں قیام کریں گے۔
پاکستانی حجاج کی وطن واپسی کا آپریشن 10 جون سے شروع ہوگا۔
