سعودی عرب میں جنرل اتھارٹی برائے شماریات کا کہنا ہے کہ 2024 کی تیسری سہ ماہی میں ملکی و غیرملکی عمرہ زائرین کی مجموعی تعداد 6.2 ملین (62 لاکھ 54 ہزار751) تک پہنچ گئی جو گزشتہ سال کی اسی سہ ماہی کے مقابلے میں 35 فیصد زیادہ ہے۔
بین الاقوامی خبر رساں ادارے کی رپورٹ کے مطابق کل عمرہ زائرین میں مردوں کی تعداد 57.4 فیصد جبکہ خواتین کی تعداد 42.6 فیصد تھی جبکہ سعودی عمرہ زائرین کی تعداد 10.7 فیصد رہی۔
رپورٹس کے مطابق 2024 کی تیسری سہ ماہی میں بیرون ملک سے سعودی عرب آنے والے عمرہ زائرین کی تعداد 3.3 ملین تک پہنچ گئی جو 2023 کی تیسری سہ ماہی کے مقابلے میں 29.2 فیصد زیادہ ہے۔
ان میں مرد زائرین کی تعداد 1.7 ملین یعنی 51 فیصد اور خواتین عمرہ زائرین کی تعداد 1.6 ملین تھی جو 49 فیصد تھی۔ داخلی عمرہ زائرین کی تعداد 2.9 ملین تک پہنچ گئی جو گزشتہ برس تیسری سہ ماہی کے مقابلے میں 42.4 فیصد زیادہ ہے۔
ان میں سعودی عمرہ زائرین کی تعداد 671.7 ہزار رہی جو کل داخلی عمرہ زائرین کا 23.1 فیصد ہے۔ اسی طرح مملکت میں رہنے والے غیرملکی عمرہ زائرین کی تعداد 2.2 ملین تھی جو کل تعداد کا 76.9 فیصد بنتا ہے۔ ان میں مردوں کی تعداد 1.8 ملین اورخواتین کی تعداد ایک ملین رہی۔
2024 کی تیسری سہ ماہی میں بیرون ملک سے 35 سے 44 سال کی عمر کے سب سے عمرہ زائرین آئے جو کل بیرونی عمرہ زائرین کا 17.6 فیصد تھے۔ اسی طرح 65 سال اور اس سے زائد عمر کے زائرین 9.2 فیصد رہے۔
ملکی عمرہ زائرین میں سب سے زیادہ تعداد 30 سے 39 سال کے عمرہ زائرین کی رہی ان کی شرح 29.2 فیصد بنتی ہے۔ رپورٹ میں بتایا گیا کہ مملکت کے اندر سے ایک بار عمرہ کرنے والوں کی تعداد 22 لاکھ 95 ہزار747 رہی۔ اگست میں داخلی عمرہ زائرین سب سے زیادہ رہے۔
سعودی عرب میں نیا قانون، ایک لاکھ ریال جرمانہ
رپورٹس کے مطابق 2024 کی تیسری سہ ماہی میں بیرون مملکت سے عمرہ ویزے کی درخواست دینے والے زائرین کی شرح 60.8 فیصد اور دیگر ویزوں پر آنے والے زائرین کا تناسب 29.7 فیصد رہا۔ ای وزٹ ویزا پر 6.6 فیصد اور خلیجی ویزے پر آنے والوں کی شرح 2.9 فیصد رہی۔
