اگر دن کا آغاز ایک اچھے اور طاقتور ناشتے سے ہو تو یہ ناصرف جسمانی بلکہ دماغی صحت کے لیے بھی انتہائی مفید ہے، یہ ہمیں کئی بیماریوں سے بچاتا ہے۔
یہ بات ہمیشہ یاد رکھنی چاہیے کہ ناشتہ سارے دن کی خوراک سے بہتر ہے، جو لوگ ناشتے کو غیر ضروری سمجھتے ہیں وہ بہت بڑی غلط فہمی کا شکار ہیں، بہترین اور متوازن ناشتے میں کن غذاؤں کا ہونا ضروری ہے اس کیلئے اس خبر لازمی پڑھیں۔
اے آر وائی نیوز کے پروگرام باخبر سویرا میں ماہر غذائیت ڈاکٹر اریج نے ناشتے میں توانائی اور غذائیت سے بھرپور پکوانوں سے متعلق ناظرین کو آگاہ کیا۔
انہوں نے کہا کہ ناشتے میں پروٹین سے بھرا کھانا مل جائے تو آپ کا دن اچھا گزرے گا، اچھے ناشتے میں نشاستہ (کاربوہائیڈریٹ) کی کافی مقدار شامل ہوتی ہے لیکن اس میں زیادہ مقدار میں چکنائی نہیں ہونی چاہیے، گندم کی روٹی، انڈہ، دہی، پھلوں کا تازہ جوس، دودھ اور پھل ایسی غذائیں ہیں جو انسانی جسم کو دن بھر ایند ھن فراہم کرتی ہیں۔
انہوں نے بتایا کہ گندم اور جو کے دلیہ سے بہتر کوئی غذا نہیں، خواتین اگر صحت مند رہنا چاہتی ہیں تو ناشتے میں جو کا دلیا ضرور کھائیں، سب سے بہتر ناشتہ ایسا ہوتا ہے جو آسانی سے ہضم ہونے والا ہو۔
