انٹرنیشنل میڈیا نے بھارتی افواج اور حکومت کے دعوؤں کے برعکس حقائق بیان کر دیے ہیں، ایلس پیٹرسن نے دی گارڈین میں آرٹیکل میں لکھا کہ مقبوضہ کشمیر میں حریت پسندوں نے بھارتی فوجیوں کو ناکوں چنے چبوا دیے ہیں۔
دی گارڈین میں ایلس پیٹرسن نے اپنی تحریر میں لکھا کہ مقبوضہ کشمیر میں انتخابات سے قبل آزادی کی جدوجہد میں تیزی سے بھارتی افواج پریشان ہیں، اور مقبوضہ وادی میں حریت پسند پہلے سے کہیں زیادہ پُر عزم ہیں، جب کہ بھارتی سیکیورٹی فورسز کا مورال پست ترین سطح پر ہے۔
انھوں نے لکھا کشمیری مجاہدین جدید ترین ہتھیاروں کا استعمال کر رہے ہیں، بھارتی افواج کشمیری مجاہدین کی گوریلا جنگی حکمت عملی سے حیران ہے، مجاہدین اہداف کو نشانہ بنا کر ناہموار پہاڑی علاقے میں غائب ہو جاتے۔
ایلس پیٹرسن کے مطابق کشمیری مجاہدین جنگی ساز و سامان کی ترسیل کے لیے وادی کے اندر ڈرونز کا استعمال کرتے ہیں، مجاہدین باڈی کیمروں کا استعمال کر کے گھات لگانے کی فلم بناتے ہیں، دوسری طرف بھارتی فوجی حکام مقبوضہ کشمیر انٹیلیجنس جمع کرنے میں دشواری کا اعتراف کرتے ہیں، ان کو کشمیری مجاہدین کا سراغ لگانے میں مشکلات کا سامنا ہے۔
انھوں نے مزید لکھا کہ کشمیری مجاہدین ہندو اکثریتی نئے علاقوں میں گھات لگا کر حملے کر رہے ہیں، انھوں نے بھارتی فوجیوں پر حملہ کر کے فوراً غائب ہونے کا نیا حربہ اپنا لیا ہے۔ دوسری طرف ماہرین کا کہنا ہے کہ حریت پسند جدوجہد روکنے کے لیے بھارتی فورسز کی کوششیں دہلی سرکار کے دعوؤں کی تردید کرتی ہیں۔
بھارتی افواج کا کہنا ہے کہ مقبوضہ کشمیر میں مجاہدین بہتر تربیت یافتہ اور ان کے پاس جدید ترین ہتھیار ہیں، ہم بھارتی حکومت سے اضافی مدد مانگ رہے ہیں، ان کا یہ بھی کہنا ہے کہ کشمیری مجاہدین کے حملوں سے اس بار ہم زیادہ خوف زدہ ہیں۔
