بھارت میں دلہن نے رخصتی کے وقت کسی گاڑی میں نہیں بلکہ بیل گاڑی میں سسرال پہنچ کر سب کو حیران کردیا۔
بھارتی میڈیا رپورٹس کے مطابق ریاست اڑیسا کے گنجام ضلع میں دلہا اور دلہن نے شادی کی پرانی رسومات کو برقرار رکھا اور رخصتی کے وقت گاڑی کے بجائے بیل گاڑی کا انتخاب کیا۔
دلہن سریتا بہیرا اور مہیندر نائک بھونیشور میں ایک نجی کمپنی میں کام کرتے ہیں۔
دلہا اور دلہن نے شادی کا فیصلہ کرنے کے بعد کچھ پرانی روایات پر عمل کرنا چاہا جو آج کے دور میں شاذو ناظر ہی دیکھنے کو ملتی ہے۔
سریتا اور مہیندر نے اہلخانہ کو بتایا کہ ان کی شادی میں کوئی گاڑی استعمال نہیں کی جائے گی۔
مہندر بارات لے کر گھوڑے پر سوار ہوکر دلہن کے گھر پہنچے جب کہ سریتا شادی کے بعد سجی ہوئی بیل گاڑی میں سسرال چلی گئیں۔
شادی کو ایک یادگار تقریب بنانے کے لیے، مہندر نے سریتا کو شادی کے مقام پر لانے کے لیے قریبی گاؤں سے بیل گاڑی کرایہ پر لینے کا فیصلہ کیا تھا۔ گاؤں والوں نے بتایا کہ مہندر اور اس کے دوستوں نے بیل گاڑی کو بانس کے ہڈ اور پھولوں سے سجایا تھا۔
