مشی خان کو گلوکار ابرار الحق کی بات ایک آنکھ نہ بھائی، کترینہ کیف کے ساتھ کام کرنے کی آفر کی بات کو انھوں نے لطیفہ قرار دیدیا۔
پاکستان شوبز انڈسٹری کی اداکارہ مشی خان سوشل میڈیا پلیٹ فارم انسٹاگرام پر اس حوالے سے ایک ویڈیو شیئر کی ہے جس میں انھوں نے ابرار کا مضحکہ اڑاتے ہوئے گلوکار کے دماغی توازن پر شبہ بھی ظاہر کیا ہے۔
اداکارہ نے کہا کہ روز روز اتنی مزیدار خبریں سننے کو ملتی ہیں کہ سمجھ نہیں آتی کہ انسان ہنسے، روئے یا کیا کرے، سنا ہے کہ ابرار الحق نے کترینہ کیف کے ساتھ فلم کی آفر ٹھکرا دی۔
انھوں اپنی ویڈیو میں زوردار قہقہہ لگاتے ہوئے کہا کہ یہ سال کا سب سے شاندار لطیفہ ہے، یہ فلم آپکو کس سن میں آفر ہوئی تھی ابرار الحق صاحب، آپ کو یہ اتنے سال بعد کیوں یاد آیا؟
مشی نے طنز کرتے ہوئے کہا کہ یہ کوئی بات ہے کرنے والی، اس اسٹیج اور اس عمر میں، آپ سمیت متعدد افراد کے پارٹی چھوڑنے کے بعد دماغ میں کچھ ہلچل سی مچی ہوئی ہے۔
واضح رہے کہ کچھ روز قبل ایک پوڈ کاسٹ میں معروف گلوکار ابرار الحق نے دعویٰ کیا تھا کہ انھیں بھارتی حسینہ کترینہ کیف کے ساتھ فلم کی آفر ہوئی تھی جو کہ معروف بھارتی پروڈکشن کمپنی ’ایروس‘ نے کی تھی۔
ابرار کے مطابق انھوں نے فلم کی پیشکش ٹھکرادی تھی کیونکہ انھیں شرائط پسند نہیں آئی تھیں۔ میرے انکار کا سن کر کمپنی کافی حیران ہوئی اور انھوں نے کہا کہ ہمیں آج تک کسی نے منع نہیں کیا۔
